梁齊昕「出名臭」策略之成功

梁齊昕由人人喊打的臭四，搖身一變成為689高牆下的雞蛋，fb死而復生，姑勿論是否自編自導自演，作為一個銳意打入娛樂圈的新人，單看媒體的報導頻率以致社交網絡的反應，她已經成功踏出第一步，黃絲藍絲皆有她的捧場客。

我對此感到驚奇，大概一年前她因為評論劉進圖遇襲事件而飽受攻擊，雖然香港人善忘是常識，但要轉身而不失霸氣亦絕非搏大霧可成。身為689之親女兒，可坐收藍絲擁戴，其代價就是飽受黃絲冷嘲熱諷，然而齊陰公主巧妙運用「出名臭」的策略，成功舔盡兩家茶禮。

何謂「出名臭」？先回顧一下《國產凌凌漆》的經典對白：

凌凌漆：夥計。

夥計：係。

凌凌漆：你哋呢度啲豆腐花又話最出名嘅。

夥計：係啊。

凌凌漆：臭架喎。

夥計：出名臭吖嘛。

凌凌漆：咁唔該可唔可以攞啲出名好食嘅過我呢？

夥計：都係豆腐花囉。

凌凌漆：唔係啩？

夥計：係呀，你當佢臭豆腐咁食，觀感就會fit曬。

即使世間上有一樣嘢叫臭豆腐，普遍而言「臭」仍然是偏向負面，不過只要能夠找到「出名」的價值，大家就會忽略「臭」的反感，明將壽司就是其中佼佼者，以獵奇心態覆蓋差劣味道。

梁齊昕借689的專橫形象，把自己塑造成受害者，成功將她在黃絲眼中的負面形象一筆勾銷，同時亦沒有嚴重得罪藍絲，乘政治形勢提高人氣，相當高明。

不擇手段？You can't argue with success。