以前追女仔，有啲女仔好憎睇西片， 因為聽唔明，所以寧願睇風雲、龍虎風雲、監獄風雲。世界真的變了， 宜家好多女人 (因為女仔已長大了)， 明明唔識聽韓文， 卻成日煲韓劇， 包括您阿媽、您老婆、您女友、您個女 & 我個女嘅阿媽！

好多男仔睇完星星， 亦去剪番個都敏俊頭， 我想咁... ... 但無咁做，因為一般中年男士都曾向破案率奇高的香港警方報失頭髮， 可惜警方束手無策。

昨天偕同好友， 幾家大細港島區晚飯， 有人建議韓燒， 無人反對。大家有車有小朋友， 首要考慮泊車， 其次不用等位， 最後要有BB櫈兼環境舒適， 選擇了銅鑼灣世貿名家。

 

點了很多道菜如泡菜薄餅、炒粉絲、炒年糕、豬手等不錯。尤其是燒五花腩， 非常喜歡。又叫了一道部隊鍋， 為這餐每人花超過$500的晚飯， “錦上添花”！！！

部隊鍋的來由，係啲韓仔當兵時無啖好食， 所以將所有廚餘或材料煲在一起， 相似於廣東人的大馬站煲或客家人的七彩雜錦煲。

昨天最後出場的部隊鍋， 一貫韓式鍋物， 大大隻平底鍋盛出來， 有泡菜辣湯、雞肉香腸切粒、司華力腸切片、午餐肉每人夠分一小片、少許煙肉片、豆腐碎、即食麵另上(估計有3包辛辣麵份量)， 7位大人剛剛每人分到1小碗， 味道尚算合格， 感覺就像打8號風球時係冰箱搵啲嘢出嚟煮碗辛辣麵。

最神奇之處係， 呢鍋嘢盛惠$420.00。名家的韓國佬老闆， 麻煩您收得呢個價錢， 俾返少少誠意好嗎? (有圖為証)