平日很少齋寫食評, 因為未夠斤兩。忍不住了, 因為呢碗麵實在夠斤兩, 又美味, 又抵食, 但很高膽固醇。
葵涌和宜合道附近有間小上海, 毫不起眼, 上星期同事介紹下去食晏, 試過返尋味, 今日再來。
初睇餐牌, 見主力sell 擔擔麵、小籠包、窩貼, 突然被我發現另一張餐牌上有蟹粉拌麵只售$70, 心諗咁平的話一試無妨, 因為平時任何一間上海菜館, 分分鐘收您超過$200至$300。您實會問, $70會有幾多蟹粉吖? 講多無謂, 自己睇相吧!
足夠一人份量。碗內麵條係上海幼麵, 有咬口, 似手拉麵水準, 但問過是由麵廠交來的。蟹粉連蟹肉足足有一隻蟹分量, 估計足五両。本來有幾條青瓜絲, 我覺得不配, 今天再吃便走了青瓜。
其實吃完這碗蟹粉拌麵已夠飽夠膩了, 但不吃該店的小籠包難以劃上完美句號。他們的小籠包一籠四隻, 毫不花巧, 皮薄不易穿, 肉汁豐富, 又無味精 (外面很多自稱小籠包專家的, 我每次吃罷都異常口渴)。通常我習慣待溫度適中時, 用筷子夾起頂端, 底部沾一點醋, 然後全隻放入口爆, 那種熱到剛剛忍受到而又能盡吸所有肉味湯味的快感, 非常滿足!
