裝修佬逐個捉 - 敢於嘗試的Ken師傅

「KEN師傅」：由發掘到發現了自己的職業

 
(照片: KEN師傅現身於2018年12月29日DIY班。)

強：咁後生嘅裝修師傅，好少見喎！
KEN：宜家啲年輕人…唔會揀咁辛苦嘅職業掛。

強：你未答我個問題喎。
KEN：唔好講笑啦我都唔後生喇。

強：聽講你啱啱結婚喎。
KEN：大把人步入中年先結婚啦。

強：好啦，言歸正傳，可以講下你點解會入行做裝修？
KEN：因為我爸爸做裝修，我又跟佢搵食，講完。

強：有鏡頭、相機對住我地，比啲誠意得唔得。
KEN：其實我以前都無想過做裝修，試一次後，我覺得又好玩、好啱我…所以我決定繼續做。

強：即係裝修已經成為你終身職業啦？
KEN：我唔敢肯定…因為我好鍾意學野、試新野，話唔定有朝一日我會搵到比裝修更加好玩嘅嘢…然後轉行！

強：試新野嘅定義係乜？
KEN：其實只要我覺得有興趣嘅野…就想去學。學完一個又一個，學海無涯嘛。

強：你講到自己是一個學霸咁喎，你細個年年考第一？
KEN：又唔係，我讀書麻麻啦。

強：你鍾意學習喎，點解讀書麻麻？
KEN：課本嘅嘢唔一樣，我鍾意嘅係可以落手落腳實踐嘅野，比如…包壽司。

強：（（無言））
KEN：我真係做過三個月壽司學徒，嗰陣個日本來港嘅師父…仲想我繼續幫佢手，不過我發現自己唔想做廚，所以唔做。

強：學識點包壽司先至覺得自己唔啱？
KEN：無法，嗰時太年輕，未知道自己想點，所以想繼續試多啲嘢。

強：之後就轉咗做裝修？
KEN：未啊，後來我去讀商科，畢業後搵咗份寫字樓工。

強：真係估你唔到，然後呢？
KEN：然後辭咗職囉。

強：因為寫字樓唔啱你？
KEN：無錯，坐寫子樓又悶又要對住班鍾意勾心鬥角嘅人，同事鍾意搞分黨分派，我覺得好攰。

強：咁後來又點呢，終於轉做裝修？
KEN：哈哈，阿爸終於頂我唔順，話我唔生性，叫我跟佢搵食囉。

強：是不是你比唔到家用，佢老人家唔高興？
KEN：Ｘ，講呢啲！

強：所以你爸爸帶你入行，然後就一直做到現在？
KEN：唔係，我一年後就去咗澳洲Working Holiday做農夫、漁夫，感受下大自然，順便學埋揸船呀、打獵呀、野外求生咁啦。

強：（（無言））
KEN：我人在澳洲時，其實有幫人做裝修ga！順便學埋澳洲人的裝修，先知道同香港完全不一樣。

強：你覺得裝修好玩有趣的地方是？
KEN：每逢新裝修，肯定和上次不一樣：即係會不斷有新挑戰！我不喜歡做重複的事，因為我追求一個需要重新學習，然後可以運用新知識去實踐的過程，這就是我覺得裝修好玩的地方…滿足到我咁多個慾望！

強：也就是說，你喜歡裝修所以才會做裝修。
KEN：沒錯，如果不喜歡，肯定唔會做得好啦，Right？

強：咁一個成功嘅裝修師傅最重要係啲乜，識講英文？
KEN：年輕？靚仔？

強：你又話自己步入中年……
KEN：講笑咩，我仲好後生！

裝修強

裝修強生於香港，曾任職作家、編劇、貿易商，現為裝修佬。得意技能：只需抽一支煙的時間便能構思好內容，再以飲一杯啤酒的時間寫好草稿；此技能適用於任何工作。沒有特定風格（即多變）也不堅持己見（即多變）因而難以觸摸，習慣直覺判斷。需講粗口提高個人電力，若能量不足便透過飲醉重新啟動。是極度麻煩卻又相當專業的文化人，弱點是長期糧尾。