鐵甲萬能俠頭

Evolution Toy 出既兩隻鐵甲萬能俠頭座連飛機，抵唔抵買就見人見智，最初睇官圖都係無意慾，後來睇過實物就變咗十五十六；原本仲緊持到最後防線，點知2號魔鬼以低於市價再85%話咩酬賓週，就係呢條酬...賓週擊潰防線，落坑再翻追1號，安心上路。

兩隻頭座賣點我覺得唔係個頭，細細隻全膠製，重點反而落於朋友號和金鷹號上，兩機全金屬（除咗對翼）製作，金鷹號降落後，劍鐵也 ／ 康定邦會自動由垂直轉作水平調節，算是精細既設計。

亦因為設計既關係，相信ET呢條Line亦告一段落，因為3號巨靈神唔需要飛機降落合體，要一家人齊齊整整，相信要呢隻老翻錢罌頂住檔先。