【食譜】秋冬暖笠笠！零失敗煲仔飯

沒有最痛，只有更痛……

上星期覺得自己背部同手臂好痛就去睇中醫打算做針炙，點知我體質不適合做針炙就做拔罐。

但做完仍然好痛，晚上痛到失眠，實在無辦法下去睇醫生。

原來筋膜發炎，痛到真係好難形容痛到想撞頭埋牆，又痛到行、坐、企、瞓都係痛。

睇完醫生一袋消炎藥止痛藥肌肉藥都要吞下，我坐晌度打字都好痛，但我唔可以放棄寫食譜比大家。

加上好多日無煮飯比包包食，包包包話想食媽咪煮嘅飯，我唯有煮最容易的煲仔飯。

每年都煮每年都寫呢個零失敗煲仔飯，有飯焦又香又唔黏煲～

我朋友又幫我買到靚鵝肝腸，一煲過我都應付得到呢。

祕訣：

用之前搽一層麻油

然後先放米及水，就唔會黏底，或少機會黏底的

飯同水比例與用電飯煲一樣

先開大火煮滾，轉小火蓋上蓋煮剛收水就放料

我用潤腸同雞，雞只需要用鹽、胡椒粉、薑同蔥撈勻再加生粉撈、最後加上麻油醃半小時以上。

醃雞唔要用水份醃料，因會令飯變濕又會漿。

所以用鹽、胡椒粉等已經夠。

繼續蓋上蓋用慢火煮15-20分鐘，開蓋望下雞熟唔熟，熟後就熄火蓋蓋焗5分鐘就完成。


甜豉油做法：

我所有材料隨意

材料：

老抽2-3湯匙

生抽 1茶匙

熱水 1/4碗

糖 2茶匙-3茶匙 (可隨意加減) 

麻油少許

撈勻便可以了