【係咪好想要呢…】台灣好奶奶幫新抱坐月 3餐全包當女咁照顧

奶奶與新抱的關係一向是最「難搞」，但台灣這一個新好奶奶，好到新抱生完兩個月，都仲好感動奶奶坐月為佢做嘅一切！

台灣一名女網友日前就係Facebook Page「爆廢公社」，分享一段令人羨慕嘅坐月經歷，令網民都羨慕到不得了呀！話說，呢位媽媽兩個月前剖腹生產完後，就由奶奶幫佢坐月，點知呢位奶奶無微不至到，每日早起幫佢準備坐月餐，再大熱天時拎住親自送到病房畀佢，出院返到屋企後，更加係一日三餐都煮唔同款式嘅菜式同補湯畀佢補身，啲湯仲要係連電鍋一齊搬入佢房間，確證佢飲到嘅係熱湯添呀！

咁都唔止，奶奶仲擔心初生BB夜晚成日喊，會嘈到新抱坐月、唔夠休息，每晚半夜將BB抱去同自己瞓，仲日日包辦埋BB沖涼嘅任務！

女網友指，自己係奶奶比媽媽更細心嘅照顧之下，身體恢復超快，亦無留低任何後遺症，唯一頭痛就係補得太好，無瘦到……令佢真係超超超感動！

好多網友睇完後都紛紛表示羨慕，話佢奶奶對佢真係同親生女無分別呀！更有人感慨話：「這種婆婆，為她洗腳都心甘情願」睇埋奶奶啲「坐月餐」手勢，更大讚：「這婆婆比月嫂還強」、「廚師級」！