EX 02 飛天金剛鑽

最近無論新版定再版，論數目，金剛飛天鑽應該入三甲，2014年先後由Evolution Toy, CMs/Arcadia再版了兩款，2015 Evolution Toy又公佈了一款，相信陸續有來...！

以合金來講，過往每間廠，無論用咩名，包括笨大超魂既鋼鐵神，或各廠既飛天金剛鑽（佳視譯名），都“不負“他的另一個名字 ~ 磁力鐵甲人（無線譯名），盡情咁用磁石做關節接駁位，雖然設計名正言順有噱頭，但問題係隻隻飽食軟骨散，無隻企得穩，強如笨大亦不能幸免...！

在本人眾多收藏中，最鍾意的反而是這款Art Storm於2010出品，作為ES合金系列的第二彈作品。Q版樣超可愛，由於矮重心低點企都企得穩，雖然運用磁石接駁位置較少，但反而覺得佢係應用先用，絕不濫，而且人馬腰間接合機關設計好正，除咗李小龍，佢名符其實地做到“腰馬合一“既境界。雖然係Q版，但絕對無偷雞，武器，飛馬，變身合體全部做足，難怪由原價幾舊水，現時長期硬企四個位，貴得有道理。