對於一個八十後來講，細過時無智能手機、無平板電腦、更加唔好話上網搵野睇。到依家三十有幾乜都有個陣，睇返轉頭，發現好多以前玩得好開心嘅野，唔係隨著時代進步而消失，就係被其他野所取代。今次就當係致一眾八十後，回望一下當年我地擁有過世界上最簡單，亦最好玩嘅野。
1.發泡膠飛機
長條型包裝，裡面裝著三塊發泡膠、加多個硬膠機鼻同用得個睇字嘅螺旋槳，之係將佢地砌埋一齊，咁就係一架飛機模型。以前細個，仲來好似班老表咁，買盒雙星模型砌，但又鍾意玩飛機，就係咁樣幾蚊一架飛機仔已經夠玩一兩日，當然最後結果，唔係飛飛下飛埋咗落樓下執都執唔返，就係啲機翼玩到爛晒，連機都起唔到。
當然，依家要搵返來玩都唔係搵唔到，但試問依家，除咗我地想要懷緬過去之外，仲有幾多細路或大人會去玩呢樣野？
2.豹虎
以前住公屋，學校附近嘅文具鋪最多細路玩，就一定係呢樣：豹虎。一個竹葉盒仔，裡面裝著一隻蜘蛛仔咁嘅虫（其實真係蜘蛛，叫Thiania subopressa）。細個放學無野做，去到文具鋪外面就係圍埋其他學校學生，一係就放低五蚊抽一隻，然後成班連名都叫唔出嘅人，就好似係你後面睇著你抽個隻大唔大隻。然後，戲肉當然係搵個兜仔，放兩隻豹虎落去等佢地打餐死。當中無任何賭博成份（最低限度我唔記得有），單純係睇著佢地打都覺得開心。
我懷疑，我依家咁鍾意睇人仆街呢個習慣，係咪細個睇人鬥豹虎個陣養成？
3.枝裝吹波膠
當年幾毫子一枝，除咗陣味幾臭下之外，真係唔知佢裡面咩成份。不過細個點會理得咁多，有得玩下吹個波出來，就已經心滿意足。不過最記得，永遠都係吹吹下，唔知係咁放得太多膠，定係口水濕完吹波用個枝管。成日枝管都好似一枝箭咁飛出去，結果成枝膠因為無咗枝管，咁就報銷。
4.萬變咭（閃咭）
去到香港日本卡通片好hit個年代，正確係邊年我就唔記得，總之就係夜晚11、12點播聖鬥士星矢、日頭仲播緊機動警察個陣），Bandai就係香港推出咗萬變咭，個時一蚊抽一張，雖然上面本身有晒玩法（戰鬥力，特殊技），不過當時上面全部都係日文真係識鬼睇。結果全部當晒公仔紙咁玩，再唔係就得過儲字。到後來重發展到有埋暗閃、閃中閃個啲，不過玩到後期已經越出越濫，就連《Yes》都出埋自己嘅明星閃咭，最後當然係收手無再玩落去。
直到2008年，陳冠希套「閃咭」出咗，我先有返條癮同「朋友」交換閃咭。
5.彈波機
咩係彈波機？就係俾五個乒乓波你，你彈到其中一行有三個波（或四個？），就會有相對獎品俾你。個時真係乜野小玩意都有，當中包括埋之前講個三樣野。而出奇地，依家都仲會係香港見到呢種彈波機，不過唔係啲舊式士多，就係屋村文具鋪外面，兩者都已經買少見少。
不過偶然都見到細路仔玩得幾開心，幾蚊雞就有個短暫娛樂，點都平過俾部平板電腦佢玩先。
6.街邊租遊戲機
返去80年代，個時世嘉五代、紅白機同超任，都唔係一般家庭話負擔得起。所以係一啲商場，甚至係公屋街市甚至文具鋪，就會買一部、甚至幾部遊戲機，再係鋪頭一個角落、整好一個架步，以幾蚊甚至十五分鐘價錢，租機俾啲細路甚至後生仔去打機。有錢嘅，租機玩；無錢嘅，就睇人玩。
不過到後來機就越來越平，而且當年一班機迷唔係大個咗有收入可以自己買機、就係去晒買咗機嘅朋友度玩。到依家就連細路都有部PSV同智能手機，呢種租機鋪自然完成咗佢地歷史任務，成為當年一班細路回憶一部分。
7.機鋪
機鋪，雖然未消失，但都同半死無乜分別。由以前仲有兒童場開始講起，入到去裡面由槍Game、飛機、忍者龜都有得玩，不過就少好多選擇（唔知係咪有揀過啲無暴力嘅遊戲先放得入兒童場）；之後十四歲，個時雖然人係澳洲，但係一年返一次香港，都見到香港格鬥Game最旺嘅年代（同埋見識到香港機鋪真人快打）。
不過到依家，有家用機、又可以上網打，而且遊戲又多，反而機鋪入一台機投資，真係唔知要何年何月先回到本。結果大家都唔敢試新野，入來入去都個幾款：開頭都可能係車Game如灣岸、頭D，之後就三國志大戰等Card Game、到最後連GvG、King of Fighter都撐唔著。後來唔知邊個搵到一堆推銀機返黎，點知就引到一班平時唔入機鋪嘅人去玩，當然最後就越入越多，而真正嘅新遊戲就越來越少。
結果…雖然機鋪仲係度，但重係當年我所認識，應有盡有，想玩乜入個銀仔就得嘅機鋪嗎？
