【食譜】送波一流！啤酒雞腿

話說又到世界杯，我對足球完完全全無興趣、大少爺就有少少興趣、包包就唔知係乜一回事。

在於我無興趣事物……當然唔會有衝動感覺。

但我會去發掘週邊可以做的事，例如……有乜食物適合睇波人士。

呢款「啤酒雞腿」就適合不過，因為佢容易整、好味。

煮完酒精揮發但留下啤酒香味，只需要用幾樣材料就可以整一大盤。

你另一半約埋波友睇波時，一盤就可以招呼晒一班人。

仲有唔想飲太多啤酒但覺得無啤酒又失落的話，呢條腿有得食又有啤酒味，一舉兩得！

不過小朋友就唔太適合，因為佢雖然無酒精，但味道對小朋友來講有點怪呢。

有時唔可以只顧自己有無興趣及感受，如果另一半鍾意睇波。即使你唔會一齊睇。但幫佢預備小食都係一種支持同參與吧～

材料：

雞下脾或      6隻(我買無激素的)

*可以用雞翼代替

啤酒     2罐(任何品牌也可以)

老抽   80ml

糖    30g

冰糖    1小粒

薑及蔥   適量

蒜頭   1粒

做法：

1. 將兩罐啤酒倒入煲     

2. 倒入老抽、糖、薑蔥、蒜頭

3. 再放一粒冰糖

4. 滾起放入雞腿然後就煮5分鐘蓋上蓋焗佢至汁變涼

5. 食之前再翻滾佢更入味