鐵金剛與百變龍開盒報告

男子氣概水桶腰，相信大家只會想起Getter 1，我敢大聲同大家講，將條水桶腰發揮得咁好，除咗本人外，目前真係只有Getter 1，但佢只係青出於藍，水桶腰鼻祖，還看鐵金剛！！！

當年第一盒模型係“細佬“百變龍（大家都咁叫，其實只係同公司既同系產品，冇“血源“關係），二揀一時直頭嫌棄鐵金剛，原因係因為我膚淺，以貌取人，覺得百變龍靚好多，仲有沙煲咁大個拳頭，射飛拳都勁啲，識揀既梗係咁揀啦。

百變龍既產品我唔算多，模型一盒，THE 合金三盒，以及呢款都入咗兩盒；Evolution Toy 一向質素都唔係太有保證，百變龍係我買既第二款，但亦係我最滿意....，每個關節都做到四平八穩，磁石波恰到好處，企得好穩陣，一定唔會出現拱橋腰情況，嗰對沙煲拳更加入形入格，掂。

至於剛到手既鐵金剛，老餅情懷有另一種睇法，唔再膚淺，我開始鍾意佢。手上擁有既鐵金剛產品同樣唔多，手辦一隻，搪膠兩隻，呢隻係目前唯一一隻合金。

偏矮，水桶腰和燒焊位，設計上俾人一隻好原始既感覺，情況就如大鐵人內一些怪獸，用鐵焊合，好RAW。（曾經以為佢係特撮機械人既鼻祖，後有師兄糾正，第一個唔係佢！）

雖然原著機設上係同廠同系，加上今次ET廠用磁石波既關係，好容易就將兩兄弟撈亂互砌，但視覺效果就得啖笑，相都費事post。

總結，呢兩兄弟無令我先望，今次嚐不到ET死的滋味，若果再出一隻比例大少少既，我一定支持和捧場。