林欣彤情人節推新歌曲《忍》搵好姐妹陳慧敏友情演出

林欣彤（Mag）去年年尾重新演繹Dear Jane的《哪裏只得我共你？》，其溫婉唱腔不但贏盡好評，其處女執導MV更在短短一個多月時間，在youtube獲得逾63萬點擊，為2017年劃上完美句號。為了承接優勢，Mag相隔不足兩個月再度在今年情人節2月14號推出全新歌曲《忍》，並請來認識逾七載的好姊妹兼戰友陳慧敏友情演出MV。

MV劇情講述飾演第三者的Mag，在一間充滿情調的餐廳安慰失戀的好友陳慧敏時，竟撞正男友向其正印求婚，由於「刺激」過度，向來對該段孽戀「忍得幾多得幾多」的Mag，終按捺不住情緒擸手袋秒速離開餐廳，更在中環街頭拔足狂跑，情節頗激。為了配合餐廳營業時間，MV需通宵進行拍攝，令最近習慣早睡早起的陳慧敏在現場呵欠連篇。不過與Mag份屬友好的她相當唔話得，只要導演一嗌Roll機，即能馬上回復精神投入拍攝，而且影后上身話喊就喊，令Mag與現場工作人員大感佩服。

至於拍攝狂奔戲份當晚，雖然氣溫只有十度，但為了配合劇情，Mag需穿著單薄衣服在街上跑足十幾廿次，更要一邊跑一邊放聲大哭兼頹爆跌坐地上，極考抵冷能力及演技。雖然鏡頭後凍到腳都震，但Mag全程毫無怨言，即使只是拍攝手部動作，仍堅持親身上陣。

事後Mag笑言整個拍攝過程最辛苦不是捱眼瞓及捱凍，而是爆喊：「我份人平時都唔係咁易喊，我好驚拍嗰陣因為喊唔出阻大家收工，所以拍之前都幾大壓力。我早一、兩日開始已經儲定啲唔開心嘢，希望逼到自己喊。」她又表示十分感激好友陳慧敏傾力演出：「真係好多謝佢，因為佢係特登由澳門坐船過嚟香港幫我拍呢個MV，而且因為導演要求好高，我哋一拍就拍咗七、八個鐘，搞到佢成朝頭早七點先收工，我真係相當唔好意思。」

是次MV內容及方向，亦是由Mag一手一腳策劃，並與導演及工作人員經過多次開會溝通，問到為何有此構思，Mag表示：「其實點解會有呢隻歌《忍》呢？係因為我有個朋友覺得我份人乜都好鍾意忍，大家傾傾吓就覺得可以試做呢隻歌。同埋我覺得情人節係一個好特別嘅節日，雖然有好多情侶會開心慶祝，但其實好多單身、或者感情生活唔係咁如意嘅人，係好想skip咗呢個節日，所以好想送呢隻歌畀佢哋，話畀佢哋知，you are not alone嘅。」