麥晴茵 大溪地拍廣告大騷三點式

K后劉麗萍(Apple姐)旗下的帝皇娛樂23歲唱跳女新人麥晴茵(Mary)上月推出首張個人Single CD《DUDE》，反應不錯，分別打入多個音樂流行榜，包括：「第42期香港唱片商會銷量榜」第10位，與蘇永康、梁漢文、韓國組合Wanna One等同躋10名之內，另外還有「名人熱爆Hit歌流行榜」第12位、「AEG Music Channel第三十七期歌曲流行榜」第20位，Mary與經理人Apple姐都十分開心興奮，Apple姐坦言唱片市道咁差，估唔到原來都有好多樂迷買碟，作為新人成績已非常喜出望外。

Mary人靚，跳得又唱得，第一張Single CD成績理想，引起同業關注，隨即被廣告商睇中，日前應旅行社邀請飛到大溪地拍攝旅遊廣告，宣傳香港直飛往大溪地直航飛行航線，Mary共逗留了13天，形容此行大開眼界，增廣不少見聞。

她最驚喜在當地玩浮潛，與魔鬼魚一齊游水，她興奮說：「從未試過魔鬼魚及鯊魚喺自己身邊游水，好似陪住我一齊游咁，可以摸魔鬼魚上面，滑嘟嘟，好得意，但千祈唔好摸到佢後面尾巴，仲有鯊魚就喺自己身邊游水，咁大個女都未試過，好開心。」

同行共有14人，大隊分別入住三間酒店，她與其中4個女仔同住一間別墅式酒店，她笑言：「呢間酒店主要招呼夫婦或情侶，浴缸完全冇遮掩，我地4個女仔喺冇遮冇擋下，一個沖涼，一個擦牙，4個女仔一齊玩得好開心。」最開心是她入住的酒店面對無敵大海景，早上望住無邊大海歎早餐，晚上則在酒店露台欣賞滿天星星。