【食譜】蜜桃牛柳

呢兩日我好沉迷睇國內真人騷，原因係陳小春個仔同鄭希怡個女，兩個小朋友都好可愛。

陳小春個仔Jasper好懂事好溫柔完全係暖男；鄭希兒個女好靚好得意。

晌睇過程中有好多共鳴，我指湊仔會發癲共鳴。

外界好多聲音話陳小春太惡、鄭希怡無耐性。

其實都要知道為人父母都係人，都會有頂唔順一刻，當然我都係一樣。

湊仔就係有好多逼到埋牆角感受，我有時見到包包掂到污糟嘢個反應更加利害。

所以睇就容易，但湊仔真係唔易。

我最唔容易係煮飯，每一餐都要諗煮乜比個仔食，又要味道好，要有營養又要有賣相。

今日包包午餐份蜜桃牛柳係成功，包包雙手無離開過隻碟，就係咁佢晌度捉實直到我影完囉。

終於食得到，你睇佢幾專心～

食譜：

牛柳   1至2件切件或粒

紫洋蔥   少許

蒜頭   1粒

蜜桃   2塊切件

醬汁：

茄汁   1湯匙

生抽   1/2茶匙

糖   1茶匙

做法：

1. 洋蔥、蜜桃、蒜頭切切切切切

2. 牛柳鹽煮之前可以用少少鹽、生粉撈一撈

3. 先將牛柳爆香至半熟再加入洋蔥、蒜頭兜勻，最後加蜜桃

4. 醬汁材料撈勻後就加入牛柳入兜勾就可以上碟呢