近幾個月，活躍於敘利亞及伊拉克嘅「伊斯蘭國」 ISIS，終於開始到美國及多個中東國家空襲（主要係沙特阿拉伯、阿聯酋及約旦三國），而且中東三國今次不止提供後勤支援、而是直接以空軍攻擊。
不過今次最奇怪，就係三個中東國家，雖然都係伊斯蘭教國家，但都分別代表著其中兩個光譜：遜尼派的沙特阿拉伯及約旦、以及什葉派佔多的阿聯酋，但三者竟然會聯合美國，一同向以遜尼派路線為主嘅ISIS開火，其實只有一個最簡單道理：鋒芒太露。
事關中東多個戰線，本來各有各打都唔太關上述中東三國事。但係偏偏中途殺出一個忽然強大起來，走激進路線嘅ISIS。一時之間，中東多國就感覺到一種危機感：先怕ISIS成功立國，然後開始繼續擴張到其他國家。所以今次軍事聯盟，就希望能夠以空襲輔助當地部隊，削弱甚至協助伊拉克及敘利亞將ISIS從中東版圖上抹殺掉。雖然咁樣未必等到以後中東三國會同伊、敘兩個新政府可以保持長期和平，但最低限度先解決一個如此逼切危機。
而另一方面，ISIS點解會惹到咁多個國家，甚至連當時咁憎美國嘅伊朗，都唔願出聲支持佢？簡單來講，走錯路線、公關出錯。舉一個最好例子，就係伊朗有如曾鈺成、ISIS則是愛國力、李偲嫣之流：雖為同路人，但有時做出來嘅事根本幫唔落手；不過ISIS最錯一點，就係佢一直只對外以殺戮方式去展示其方針（例如不信者死），亦即係話無留過餘地同後路俾自己。佢如對較弱對手的話，ISIS有機會成功，但面對實力同等、甚至更高班嘅、更強硬嘅國家。咁樣態度就自然會招來對方出手，因為你唔俾對手活路，佢就只好盡全力同你玩大佢。
所以大家出來做人，可以借鏡今次ISIS被圍攻一事，學識做人唔好做得大盡。以及就算係同道中人，都唔一定會企係你個邊…尤其當你白癡到連自己人都會打埋個陣。
