講到汗味呢味嘢……相信大家都會即刻聯想起喺酷熱天氣下,幾十人逼埋喺一卡港鐵車廂嘅濃烈氣味。尤其係汗腺特別發達、又啱啱行到身水身汗嘅男士,嗰陣味真係臭到想死!

但如果有汗味嘅對象……換咗做青春可愛又美麗嘅少女呢?情況又會唔會180度轉變呢?

日本連鎖炸雞店「天下鳥ます」最近就推出咗一款期間限定嘅女子汗味炸雞,而且唔係隨隨便便喺街度揾個女仔返嚟,而係揾咗有最強地下偶像團體之稱嘅「假面女子」(仮面女子)合作!

天下鳥ます店方表示,呢款炸雞係根據假面女子成員散發出嘅汗味而特—別—打—造。

但少女嘅汗味到底係點嘅味道呢?原來就係由檸檬汁、芝士、鹽混合而成嘅醬汁,聽落其實都無咩問題吖,仲好似幾好食咁添~

少女汗味炸雞,一份只賣400日圓,10月31日前有售。到底有無勇士去開日本嘅時間分享食評呢?

(圖片來源: rocketnews24 )