張智霖(ChiLam)和袁詠儀(靚靚)主演的浙江衛視夫妻檔真人騷《一路上有你》前晚(17日)播出第二集。繼上集在首爾玩「千里尋妻」及「冇啖好食」後，今集亦鬥智鬥力笑聲不絕。ChiLam兩度和SJ美男成員金希激拗手瓜均勝出，但其中一次靚靚為助夫竟出茅招，用膠棒篤金希激，令他輸到碌地。之後ChiLam和金希激又來個原地互抱，但姿勢騎呢，金希激還險些爆軚。
到老婆鬥力環節，由靚靚對戰田亮太太葉一茜，靚靚經過冇啖好食一役後，使盡九牛二虎之力，一邊fing頭一邊大叫「為了今天，我要好吃的！好吃的來啦！」結果靚靚憑着驚人意志鍊贏葉一茜，在旁的ChiLam在太太「賽後」即為她愛心捽手，但口中就對這場激烈賽事笑說：「太恐怖」。
今集主題是夫妻打工一天賺生活費，田亮夫婦要搬煤，ChiLam和靚靚要在餐廳做侍應，但ChiLam扮客人熱身時卻鬼馬地打了老婆屁股兩下，接著扮成最帥服務員的ChiLam亦要服侍兩位女士吃韓式烤肉。其後他們兩公婆又被安排入廚房，以凍水洗菜時，靚靚苦笑雙手已經被凍到沒感覺，ChiLam則說「我已麻痺」，要做大醬湯的靚靚坦言：「我最討厭煮飯」，ChiLam切牛肉也被師父大吼，且切肉過程甚不好受，「太難過了，我的手腕粉碎性骨折。」而靚靚切洋蔥落淚，ChiLam也拎紙巾為她抹眼。
最後環節就到老公為老婆下廚，ChiLam表演自家的「張氏蔬菜亂炒」，難得的是靚靚在三碟菜式中，憑味覺就能估中那碟菜由老公操刀，她自豪地說：「菜味道比較淡，比較像我老公做的菜。沒問題，我最愛。」
ChiLam又勝一仗，開心得即時咀老婆臉珠，在鏡頭前公開示愛：「老婆，我愛你！」隔住個mon都feel到甜。
