【食譜】家明與玫瑰？玫瑰餃子

臨近媽媽節，又再出現一堆堆花形物品，一向都對花型食物無乜太大感覺。

但早前見到呢個花型餃子，我覺得佢係可造之材，原因係個餡可以做不同變化。

由於我唔鍾意食豬肉，所以自己蝦膠放入去，但打蝦膠外型又無乜特別，咁我就做三色。

有黑松露、芫茜同紅蘿蔔，佢唔難做，最難係買好餃子皮有d地方餃子皮好厚身，要自己去摸索邊檔好，日式超級市場都有冰鮮日本餃子皮賣

反而會薄身及質感好啲啲，呢個餃子做完出來都可以呃得下人歡心，我除了自己打蝦膠仲有酸辣醋汁去配。

大少爺超鍾意個汁呢，你都可以做家明去邂逅玫瑰的。

玫瑰餃子做法：

1. 將3片餃子皮如下圖平放

2. 鋪上餡料

3. 對摺

4. 捲起

5. 家明朵玫瑰出現了

蝦膠做法：

我本身會買定啲游水蝦放冰格，所以將蝦解凍後就去殼去腸。

大家可以好似我咁，買定啲蝦趁佢郁時就放冰格，咁啲蝦就會夠爽身。

如果新鮮買回來去剁蝦膠就會無咁彈牙，用冰鮮蝦都可以的。

1. 今次做餃子我用300g蝦肉去做，將蝦完完全全索乾水。

2. 再用刀拍扁，逐隻拍到如下圖，將所有蝦拍扁後就用刀剁幾下(三兩下便可以)。

3. 加入鹽、生粉及麻油，用筷子順一方向攪。

4. 攪到咁上下就將佢撻30-40下，每次撻都用手先撈一撈，等佢唔同方位都撻得到。


5, 撻到起膠後就放入雪櫃再雪佢半小時以上，如果做三色餃子。

6. 就分成3份，各自撈入配料，如今次用紅蘿蔔、黑松露醬及芫茜。