世界巡唱《Queen of Hearts》廣州開鑼 G.E.M.自揭情傷 兩度淚灑舞台

鄧紫棋（G.E.M.）世界巡迴演唱會《Queen of Hearts 2017 World Tour》昨晚（4月1日）正式在廣州國際體育演藝中心開鑼，過萬個座位全場爆滿，鄧媽媽、爸爸、妹妹及公公專程現身撐場。約在晚上7時15分，八名化身成侍衛的舞蹈員率先為個唱揭開序幕，「紅心女王」G.E.M.身穿鮮紅色長裙及斗篷霸氣登場，並高呼：「歡迎你哋嚟到Queen of Hearts嘅城堡！」她開場便演唱首本名曲《A.I.N.Y.愛你》及《WHAT HAVE U DONE》，盡晒招牌巨肺唱功。

「低胸Elsa」仙氣飄飄

其後，G.E.M.收起了女王氣勢，穿上白色運動小背心，站上三米高台舉起Mic Stand玩全場大合唱。在自白環節時，她坦言為了籌備今次演唱會而感到很大壓力，臨開騷前更失眠發噩夢。她又表示自小抱有很多夢想，希望做偉大的事情，讓世界變得更美好：「但我呢幾年發現，要做偉大嘅事唔係在乎你做咗啲咩，而係做緊每一件事都帶着愛。原來呢個世界最需要嘅係愛，我G.E.M.存在嘅意義係Get Everybody Moving to Love！」接着，她唱出《存在》一時感觸哽咽，淚灑舞台。

G.E.M.全晚換了多套靚衫，其中一套紫藍色性感長裙，配上飄逸絲巾及吹風效果，彷彿化身成「低胸Elsa」，仙氣十足。其後，她再度剖白內心世界，講述曾受情傷所困：「每個人愛嘅時候都好想去付出，有時人生遇到唔同嘅人，你就會將自己心嘅一部分畀咗嗰個人，但有時付出咗唔一定得到回報。我曾經有一排覺得好想保護自己，唔想再付出。大個先發現，最可惜嘅唔係付出完會受傷，而係當想去付出嘅時候，已經錯過咗機會。」

兼職媒人鼓勵錫錫示愛

幸好，全場歌迷為G.E.M.集氣高呼「鄧紫棋，我愛你。鄧紫棋，送飛吻」，G.E.M.相當識做向粉絲派飛吻，更由「紅心女王」搖身一變成「紅娘」，鼓勵歌迷當場向身邊人表白及錫錫示愛。起初歌迷表現怕醜，G.E.M.即點名要求台下的妹妹親吻公公作示範，最後果然有歌迷鼓起勇氣表白，又在萬人見證下「愛的濕吻」，G.E.M.笑言：「第時你哋結婚要話我聽呀，畀返佣金我，媒人係我副業。」

70位親友專程撐場

今次演唱會找來世界頂尖製作公司Moment Factory打造舞台，展現了多個場景效果，其中一幕將舞台化成色彩繽紛的遊樂園，G.E.M.與一眾舞蹈員High爆載歌載舞。

演唱會接近尾聲時，G.E.M.兩度Encore，她在鳴謝演唱會一眾演唱會團隊時再次哭成淚人：「我每次望住Tan（經理人）同Lupo（音樂總監）都會覺得好愧疚，因為佢哋做所有嘢都係為咗我，所以當我一唔爭氣，就嘥晒佢哋嘅心機。現實中嘅我唔係每日都係皇后，唔係每日都咁叻，好多時候我都好有無力感，我唯一可以對你哋講嘅只有一句說話，就係多謝。」G.E.M.又預告廣州站預留了70張門票給親友，她的閨蜜將在尾場現身，最後背景奏出《睡公主》，為首場巡唱劃上完美句號。