10個女仔中有9個半相信都試過被非禮,而地鐵人多擠逼,尤其是返工放工嘅繁忙時間,隨時都會撞到人逼人嘅情況,呢個時候就係女仔同gentlemen最擔心、最唔舒服嘅時刻,女仔怕俾人乘機非禮,有風度嘅男士又怕俾人誤會非禮。有時一下唔覺意揩到都在所難免,但如果係色魔嘅魔掌刻意喺自己身上游移,甚至乎用下體頂住自己,咁真係極度難受!

但唔係個個女仔俾人非禮嗰陣都可以即刻反應過嚟、大聲話有人非禮自己,如果身邊嘅人見到咁嘅情況,無論男女都應該挺身而出,救受害者脫離火海!除咗旁人要仗義幫忙、受害者要勇敢說不,真正解決問題嘅重點當然係扭正施暴者嘅心態。

根據墨西哥當局嘅統計,每10個女性就有9個曾遭受性騷擾。墨西哥地鐵近日就喺車廂中設計一個「特別座位」,座位依照男性嘅胴體形狀打造,包括胸肌、小腹,以及下體。片段所見,每個人一坐落去都即刻彈返起身,相信座椅嘅質感都應該相當硬實,完全模擬到冷不防被人「硬頂」嗰種極度不適感。而坐低咗嘅人會睇到地下有張貼紙寫住「坐喺度嘅不適感,比唔上女性喺日常生活中遇到嘅各種性暴力」。

正所謂「己所不欲,勿施於人」,針唔拮到肉唔知痛,會施行性騷擾嘅變態人坐完張櫈係咪就真係會醒悟呢?

(圖片來源:Huffington Post、You Videos@YouTube)