【澳門親子之旅】「體驗夢工場」冰之歷奇冰雕展

我地今次依個『澳門冰之歷奇住宿套票體驗之旅』重點活動，就係嚟澳門威尼斯人®金光會展，嚟睇亞洲最大型嘅室內冰雕展「體驗夢工場」冰之歷奇，成班夢工場朋友都嚟左澳門，真係未入場先興奮呀！

其實對上一次舉行冰雕展時，我都已經好想帶小小豬嚟睇(當然...係我想睇啦)，不過當時小小豬仲細，一向愛豬號嘅老公都怕會冷親佢嘅至愛，所以一直都唔批准。小小豬依家都大個仔，加上又去過大棠睇過同類嘅冰雕展都冇冷病，所以就可以嚟「體驗夢工場」冰之歷奇冰雕展啦！

展覽館內的氣溫只有零下8度，所以我都做足準備，幫小小豬帶埋冷帽又帶多一件背心羽絨，入場就著多一件大會雪褸，咁就唔怕冷親啦～

準備好門票就可以入場啦~

當然都要睇清楚啲入場需知，始終場內只有零下8度，都係小心啲安全啲。

大會都會為我地免費提供雪褸，現場所見都有好多唔同尺碼，所以大人小朋友都可以有合適嘅褸，當然...…如果有需要都可以幫備私伙衫！

另外，場內都可以免費儲放個人物品，咁就唔洗一袋兩袋咁睇得唔盡興啦。

等左咁耐小小豬都有點唔耐煩，所以我地就入場睇冰雕啦！

冰雕真係好靚而且栩栩如生，全部都係色彩繽紛冰塊，再搭配合燈光及音響效果，真係好睇到我同小小豬嘩嘩聲呀~

今年展覽就以有七個「體驗夢工場」動畫主題展區，分別展出了「功夫熊貓」、「荒失失奇兵」、「史力加」、「馴龍記」、「古魯家族」以及「魔法精靈」。

第一站就係最受歡迎嘅阿寶出嚟迎接大家呀。

之後就同一眾「馴龍記」主角同大家見面。

夢工場活動又點少得「荒失失奇兵」，成班動物朋友真係好神似，十個正呀！

「魔法精靈」場景相信就係最多小朋友鐘意地方~

因為有條好靚嘅冰梯可以俾小朋友瀡呀。

上次係大棠小小豬唔夠高冇得自己瀡，今次終於有機會啦。不過，因為依度冇雪板，所以就靠件雪褸嚟瀡，但小小豬件褸又唔夠長，所以佢唔係瀡得好順。雖然係咁，不過佢一樣玩得興奮，因為佢可以係條冰梯逗留耐啲時間。

「魔法精靈」都算係最多人物主角，但都真係做得好仔細呀。

仲有「古魯家族」添。

當然唔可以少左「功夫熊貓」一眾主角，小小豬仲扮佢地打功夫添(不過...又真係唔係好似呀...哈哈哈)。

嚟到最後一站「史力加」，小小豬話最鐘意依個，因為有佢鐘意嘅綠色人仔同豬仔~

雖然係凍凍地，不過入面啲冰雕真係好靚，又好神似，所以唔覺唔覺我地都逗留左差唔多半個鐘。

我地仲未離開，因為場內仲有地方可以玩，有主題餐飲美食區同紀念品專區！

同埋小朋友最鐘意嘅主題遊戲區，有幾種唔同嘅小遊戲、互動遊戲同工作坊俾小朋友任玩呀~

離場時記得唔好忘記依個小小影相位呀(其實我都睇唔到，係小小豬發現呀)~

如果好似我咁係一個公仔+影相控(尤其係夢工場動畫粉絲)，都值得嚟影一轉，因為每一個人物及場景都係做得好仔細，辛苦各位冰雕大師為我地做一個咁靚嘅環境呀！

More information :
「體驗夢工場」冰之歷奇冰雕展覽
日期： 2017年3月16日至7月9日
場地： 澳門威尼斯人金光會展F館
時間： 上午11時至晚上8時(最後入場時間為晚上7時30分)
票價： 澳門幣/港幣120元成人及小童(3至12歲)
          澳門幣/港幣312元 家庭套票(包括三位家庭成員及一位3歲或以上小童)
**3歲或以下之小童不建議入場