絕大部人每日都會花一定時間睇手機碌facebook、ig等等，返工放工搭地鐵、坐巴士，放眼睇10個有8個都係玩緊電話，甚至約朋友一齊出去食飯，成檯人都會不自覺地睇電話。
表面上，透過社交網絡我哋好快就知道唔同地方嘅消息，同世界各地嘅人、事、物都輕易接軌，但有新嘅研究發現，花喺社交媒體上嘅時間愈多，愈容易覺得自己被社會孤立！
由美國匹茲堡大學所作嘅研究指，每日花超過兩個鐘上社交網絡嘅人，相比花少過半個鐘嘅覺得被社會隔離嘅機會高出兩倍！研究對象由1,787個年齡由19-32歲嘅美國成年人組成，被問及用喺11個流行社交媒體嘅時間同頻率，包括Facebook、YouTube、 Twitter、Google Plus、Instagram、Snapchat、Reddit、Tumblr、Pinterest、Vine，以及LinkedIn。
總體嚟講，花喺社交媒體嘅時間愈多，就愈容易降低對社會嘅歸屬感、少咗同其他人交流嘅機會，以及更難喺唔同關係中得到滿足感。
研究團隊解釋得出咁嘅結果，主要係因為花喺社交網絡嘅時間抹殺咗我哋同其他人真實咁傾計嘅機會，而且對其他人分享自己開心或者成功嘅經驗感到羨慕。（但事實係，網絡上好多人都只係報喜不報憂，錯誤地扭曲真實生活嘅面貌，誤以為人哋生活只有順利，而自己就比唔上其他人。）
所以如果覺得自己花喺facebook、ig等社交網絡嘅時間太多，而且對生活好容易感到唔開心，就真係要減少用手機嘅時間啊！得閒多啲同人傾計交流、去郊外行吓山，好過做低頭族！
（圖片來源：tumblr）
