不知不覺間，離哈利波特小說最初出版已經20年了。當年睇住一集集小說、電影嘅小朋友都已經長大成人，可以話哈利波特真係陪住我哋成長，或者話直程係同我哋一齊成長！
即使已經大個仔，但兒時想喺霍格華茲學校入面學習魔法、同哈利波特、妙麗、榮恩等經歷喺死亡邊緣游走嘅刺激大冒險嘅夢想相信仍然存留喺大家心中。呢個諗法唔再係一個夢，因為英國當地真係有間魔法學校現正開放畀麻瓜入學！
呢間學校唔係叫霍格華茲，而係叫做博斯威爾巫術學校（Bothwell School of Witchcraft），校址係一棟有500年歷史嘅英式古堡，將於今年8月正式開學。如果有興趣入讀嘅話，可以去參加由學校舉辦嘅三日兩夜魔法之旅，期間你會被「分類帽」睇穿你有嘅潛在天賦，再分派去特定學院，仲可以喺古堡裡面闖蕩，同幾百個同學一齊喺超長嘅古典餐檯上食晚飯！
但想體驗呢個實現童年夢想嘅旅程，當然要付出一定數目嘅銀兩啦。呢次旅程嘅主辦單位將於3月28號開始喺群籌網站Kickstarter 上開放集資，大家用4至5百歐元嘅價錢就可以得到魔法學校嘅入學證書，準備喺古典華麗嘅古堡中體驗哈利波特式嘅奇幻人生！
▼想了解更多，可以觀看完整嘅宣傳影片。
（圖片來源： Cosmopolitan @YouTube）
