男人好多時都鍾意收收埋埋，無論係開心唔開心都選擇唔同另一半講太多。就算係幾簡單嘅事都好，有時男人唔講、女人唔知嘅話，兩個人嘅關係好難更進一步！
如果你哋都面對咁嘅情況，覺得唔明白男朋友或老公心諗緊咩，跟住落嚟嘅8件事就要好好記低喇。其實要男人開心，唔需要太複雜㗎咋！
1. 挨住佢嘅胸膛
男人都享受保護女人嘅感覺，多啲挨住佢嘅胸口就證明你喺佢嘅懷抱中有安全感，令佢有被需要嘅感覺。
2. 主動whatsapp佢
有時男方或者會怕自己會唔會whatsapp得太密，會阻到你做嘢或感覺太煩，如果女仔可以間唔中主動whatsapp佢，話佢知你諗緊佢、掛住佢，男人睇到自然就sweet足全日啦！
3. 話畀佢知你欣賞佢
呢刻覺得你眼中嘅佢好吸引嘅話，唔好只係放喺心入面！將你嘅感覺同讚美講出嚟、話畀佢知，證明你肯定佢對呢段關係嘅努力。互相欣賞、讚美嘅關係先可以長久發展㗎。
4. 喺佢揸緊車時把玩佢嘅頭髮
原來喺男人揸緊車嗰陣，女人伸手去輕輕摸吓佢個頭，咁會令佢覺得身邊有你陪住，不期然就會微笑！但輕輕摸吓好喇，千奇唔好過份騷擾佢揸車，咪好易發生意外㗎！
5. 公開稱讚佢
如果佢特意為你準備咗驚喜，好似係浪漫嘅燭光晚餐咁，你可以影張相再share畀朋友知道，咁會令佢知道你欣賞佢嘅用心，亦唔介意分享呢份喜悅畀大家知，令佢對自己天有信心！
6. 認真、用心聽佢講嘢
女人比任何人都更明白點樣真正聆聽人哋嘅感受，唔只係用耳仔聽咁簡單，而係坐埋一齊、注視住對方，畀佢感覺到你係真誠、耐心地聽佢訴說自己嘅內心，亦令佢知道你對佢嘅重視同關愛。
7. 同朋友出街嘅時間都會whatsapp佢
呢點就當然假設嘅你嘅另一半係夠成熟、明白你需要同朋友出去玩嘅男人啦。即使佢明白你、畀足夠嘅自由你都好，假如你喺出去玩期間都主動whatsapp佢，畀佢知道你有掛住佢、諗起佢，咁佢一定覺得好sweet！
8. 日常中嘅小動作中流露出你對佢嘅愛
你唔一定要成日準備好多禮物同驚喜，或者係公開大曬恩愛先證明到你哋嘅愛，其實日常嘅小動作已經可以令你哋嘅關係更甜蜜！你可以喺行緊超市嗰陣突然攬住佢、行街嘅時候手蹺實佢，又或者喺電影開場輕輕錫佢臉頰一啖等等，唔好睇少呢啲小事，做多少少就可以令你哋深深感受到兩個人之間嘅愛㗎！
（圖片來源：tumblr）
