感謝團長安排了業界入場Pass，完成手頭工作後，今日匆匆地往Hong Kong Toys and Games Fair 走了一轉...！
由於是次展覽和一般動漫活動唔同，會場中不設零售，對象亦非一般玩具愛好者，所以會場人流較少，行得好舒服，每個攤位都可以慢慢行慢慢睇（由於過慢的關係，結果完場都未行晒，隔離BB用品展直頭冇入過，晒料。）
如果未來及將來參觀既朋友，首先真係要調教下心態先；
1）非零售展覽，冇嘢賣俾你，唔使撳錢入場喇；
2）“玩具“一詞好宏觀，唔好滿腦子Bandai,Hottoys...，全部都冇；
3）唔好隨便影相，展商對相機／手機好敏感，怕商品隨時被山寨；
4）原來玩具生產商（展館1）大多來自內地，如果識普通話，溝通會容易好多...。
在首個展館，找到點童年既感覺，男仔一定要玩車，女仔一定係洋娃娃，仲有啲掛係士多文具店既傳統的膠品...在這裡也會找到，泥膠，Lego，遙控車／飛機（現代版的直升機）,這些亦一應俱全。
再繼續前進，又出現一堆要動腦筋和富治療性的玩具，當中亦不乏讓兒童思考和創作的元素，這類形玩具，相信好多現代家長都鍾意和樂於購買。
行行吓有忽然有種感覺，就像這個參觀路程，就像兒童的成長一樣，所見的玩具，愈行愈對玩家的要求高；往後展示的，愈來愈“成人“，好似電子機械人，金屬車仔，魔術道具，滑板....。展館二最熟悉的，就是那間港產拉打公司，最印像深的，就是那間3D打印公司（人多冇問到究竟佢賣咩，服務還是機器？）攤位中展示了一個3D打印出來的Ironman頭盔，上埋色後像真度都好高。
再往後的就是這個Fair的另一部份 ~ Games。主要都係一啲電子遊戲Apps，由於時間關係，這部份未及細看。
後記：
一個攤位展示的體感遊戲，內置200合1，遊戲和畫質都唔錯，好適合用於工作上進行訓練，而且每部只需US$20，可惜的是，最少要買1,000台...！
走既時候聽到個亞姐嘈，話大會安排唔好，原來所指既係吸印仔送紀念品，簡單玩法，於兩個指定服務台吸兩個印就得，（但按服務台位置，係要人順住流程參觀）,亞姐來咗兩日都吸唔到一個，原來首日早上入場服務台未開，昨日再來，服務台又提早收咗（官方時間寫住9：00 - 6：00），難怪亞姐嬲。
