【室內設計】細單位裝修5大技巧

（文：Freaky）

細單位裝修比起大單位裝修更講技巧更講功夫，既要做到儲物空間夠、兼顧功能性，仲要整體嘅風格設計，以下裝修佬同大家分享細單位裝修技巧，通過顏色、燈光、戶型間隔、家具選擇方便增加室內實用面積，希望幫到你。

1. 開放式廚房 

如果客廳同廚房嘅面積唔大，可以考慮將廚房改為開放式，開放式廚房最大嘅問題係油煙，其實現時抽油煙機嘅抽油煙效果非常唔錯，當然要配合日常清潔。另外，可以係開放式廚房中擺一張“蝴蝶枱”即係伸縮枱，需要時再拉開，既可作為飯枱又可作為工作區，一舉兩得。 

2. 顏色選擇 

係設計房屋時，自己先預覽下總體顏色嘅配搭，先唔考慮材質，用色板對照，設計唔可以超過4~5大顏色，而且，色調唔可以對立（即顏色盡量接近），因為顏色過多過雜混亂，從而令空間感覺變得更細。 

3. 燈光效果 

唔同嘅照射方式，燈光嘅高低，都會令原本日光下嘅視覺感，變成另外一個樣，就好似原本日頭見到牆面顏色，燈光照射下，會有完全唔同嘅變化。另外，燈光嘅強弱亦會影響心理，總體來講，按照明廳暗室嘅原則來設置家居燈飾。 

4. 榻榻米 

榻榻米式設計，雖然唔係太多人可以接受到，但無疑，佢系為細單位房屋而存在，可以增加儲物空間及室內活動空間，兩全其美。 

5. 家具擺設盡量精簡 

家具係一個屋企嘅靈魂所在，由於地方面積有限，家具係選擇方面一定要精挑細選，如果條件許可，盡可能度身定做，一來可以配合整體家居設計，二來可以將屋企每寸空間盡用，避免自己挑選嘅家具會同成個設計格格不入。

(以上圖片均來自網路，如有任何版權問題，請與本站聯絡)