好多時候當女士們講到理想對象嘅標準，通常都會話想要個高大靚仔，絕對唔會話想要一個矮肥男做自己嘅白馬王子。如果你平時習慣直接跳過同肥仔發展嘅可能，睇完下文可能會令你改觀，發現佢哋原來係最適合你嘅理想伴侶！
1. 肥代表佢活得自在快樂，並非懶惰或唔開心
肥仔通常性格都比較樂天，呢種特質往往可以延續到婚姻，令你呢一世過得幸福快樂。一項有關健康心理學嘅研究指，一對開心快樂嘅伴侶喺結婚之後都傾向增磅，即係傳說中嘅幸福肥啊！
2. 佢哋明白你嘅體重煩惱
無論你嘅伴侶係一個瘦男、肌肉佬，定肥仔都好，你都應該確保佢哋唔會膚淺到知你重左幾磅就即刻批鬥你。呢個情況上，肥男對於你體重嘅升降往往嚟得更包容同體諒，分分鐘仲會覺得你愈肥愈可愛！其實愛唔在乎兩個人嘅體重係幾多，最重要係互相理解！
3. 同佢哋攬最舒服
無錯，六嚿腹肌同大手瓜係幾好望，但到真係攬攬錫錫嘅親密時刻，肥肥嘅肚腩反而可能係你呢一世墊過最舒服嘅CUSHION！而且仲係專屬於你，世界上獨一無二嘅添！
4. 佢哋可能比你想像中更健康
如果你覺得伴侶嘅健康最緊要，咁你就千奇唔可以錯過肥仔喇！美國醫學會期刊嘅學者指出，其實超重一群（注意唔係痴肥）嘅壽命可能比臨床標準上屬於正常體重嘅人更長！所以如果你想伴侶可以陪你一齊到老，揀一個多啲肥肉嘅男士可能更加啱！
5. 佢哋有更好嘅床上表現
到底Size對床上表現重唔重要呢？唔好心邪啊，因為係講緊肚腩嘅Size咋！土耳其一個研究就指有住大大個肚腩嘅超重男，表現反而更加持久！原因係佢哋體內有較多嘅女性荷爾蒙，所以高潮會嚟得比較慢，即係話你哋可以有漫漫長夜慢慢玩（奸笑）！
（圖片來源：flickr、tumblr）
