今日俾左個大驚喜老公,整左佢好鐘意食嘅尖椒皮蛋。。。。大成功呀~
Picture
 

其實老公都好鐘意食依個尖椒皮蛋,基本上次次去食米線都一定會叫一碟。見佢咁鐘意我都有問過佢,不如我去學整俾你食啦!

點知佢一句:又唔係貴...唔洗專登買材料嚟整,想食咪出街食就得啦!

哈哈哈....你越唔洗我整,我就越要去整俾你食,所以依排我都不停上網搵食譜,終於搵到個簡易版得嚟又似正貨嘅整俾佢食。

材料唔算好多,只係幾樣就做到,包括有:皮蛋2隻、黃椒1隻、蒜頭2粒、白醋 3湯匙、生抽 3湯匙、花椒油2湯匙、糖1湯匙及芫茜少少~
Picture

基本上所有材料係超市或者街市雜貨店都可以買到,另外原食譜係用指天椒,不過我第一次整唔知個味會係點,所以就用左屋企現有嘅黃椒,諗住冇咁辣(第一次整都係安全啲好..呵呵呵)。

先將皮蛋去殼,然後一開四咁切開,鋪係碟上~
Picture

黃椒洗淨去籽切粒;蒜頭啄成蒜蓉~
Picture

先用少少油爆香黃椒粒,然後盛起備用~
Picture

又用少少油爆香蒜蓉,之後加入1湯匙糖,當糖溶晒之後亦都可以盛起備用~
Picture

待蒜蓉冷卻之後,就可以加入白醋 3湯匙、生抽 3湯匙及花椒油2湯匙,拌勻後成為個醬汁~
Picture

將黃椒粒及少少芫茜加在皮蛋上~
Picture

然後慢慢倒入醬汁~
Picture

加多少少芫茜扮靚靚,咁就成為左依個A貨尖椒皮蛋~
Picture

我成個整嘅過程老公都係完全唔知情,所以當佢一見到依碟之後,佢第一個反應都係驚多過喜(洗唔洗對我咁冇信心呀),不詔食左第一粒之後,佢就話我依個A貨同正貨味道差唔多,之後越食越多,成碟差唔多俾佢KO哂,超興奮呀……YEAH!

雖然味道差唔多,不過唯一就係少左指天椒嘅辣味。有左今次成功經驗,下次我就一定用埋指天椒,咁就可以100分滿分啦!


 【食譜】A貨尖椒皮蛋

 https://www.facebook.com/kinseymama