根據《印度時報》報道，舊年12月一個由孟買飛往美國新澤西洲嘅男乘客專登放棄商務艙嘅座位，坐到經濟艙一名女性嘅旁邊，趁佢瞓著覺嘅時候亂咁摸。之後唔夠兩個禮拜，一班由阿曼飛去德里嘅航班上，亦有一個空姐聲稱被男乘客「鹹豬手」。
根據BBC報道，印度航空將會喺A320客機經濟艙嘅前排預留6個位置畀單獨旅行嘅女性乘客。有需要嘅女性可於check in時講明呢個要求，唔需要額外繳交任何費用。機上仲會同時備有兩副手扣，供空姐或空少喺遇到滋擾嘅乘客時將佢哋制服。
但就唔係每一個人都歡迎呢個新安排，前印度航空嘅行政成員就指呢項安排係世界其他地方絕無僅有嘅，認為當遇到滋擾乘客時，機上工作人員有權跟據法律將佢制服，所以航班對女性乘客嚟講並唔係唔安全。
而印度航空引起爭議嘅情況亦非罕有，早喺2015年就有指公司高層同部份職員講話佢哋嘅身形對空姐嚟講太肥，甚至會令燃油開支加重負擔。
（圖片來源：tumblr）
