【裝修佬話你知】清潔可以好輕鬆！廁所用具的清洗方法

（文：康少）

廁所潮濕嘅環境成為屋企最容易藏污納垢嘅地方，要打掃得乾淨整潔非常吃力，好多家庭主婦都會抱怨廁所難做清潔，頭都大埋。其實，只要用啱方法，你就會發現，清潔廁所都可以好輕鬆，究竟有咩個中奧妙呢？裝修佬話你知。

水龍頭 

將剃鬚膏擦係水龍頭上面，然後用濕布抹，最後沖洗乾淨便可，簡單快捷，而且抹完後仲非常乾淨。 

浴室鏡 

清潔浴室鏡嘅步驟同清洗水龍頭步驟差唔多，用紙巾將剃鬚膏擦係浴室鏡上面，跟住用濕紙巾將泡泡均勻抹成塊鏡上，最後用水沖洗乾淨便可，抹完後光亮清香、乾淨清楚長達一個星期。 

清洗淋浴頭 

淋浴頭表面容易積滿水垢，用醋就可以方便去除。將清水同白醋按1:1比例混合，用膠袋裝起來，然後將淋浴頭拆落來浸係膠袋度，密封好，靜置半個鐘後擰出來，用熱水沖刷下便可。 

浴簾 

將浴簾丟入洗衣機，然後用中性洗滌劑或半杯梳打粉，可以係洗衣機入面放幾條毛巾或床單窗簾，咁樣既能夠去除霉菌，又可以保護浴簾唔會洗爛，最後浴簾掛起來自然風乾。要特別留意，千祈唔好用紙巾或抹布去抹浴簾上嘅霉菌，咁做係根本無法根除。 

瓷磚 

按1:1比例混合水同白醋或用漂白水，用樽裝起身，然後紙巾噴係瓷磚上面，噴完後等瓷磚自然風乾，最後，用水將瓷磚徹底沖洗一次便可。至於難清洗嘅黑點，可以用梳打粉同水調成糊狀，然後使用舊牙刷將黑點刷走即可。 

馬桶 

馬桶係廁所最污糟嘅潔具，而且馬桶嘅使用次數頻繁，好難可以徹底清潔乾淨。臨瞓前，倒半支可樂係馬桶靜置一晚，第二日沖走，呢個方法會較輕鬆，如果想乾淨啲，可以改用白醋，消毒又殺菌。 

淤塞排水管 

係排水管倒少許梳打粉，然後再倒一杯醋，幾分鐘後用熱水沖一下便可。

(以上圖片均來自網路，如有任何版權問題，請與本站聯絡)