想知道自己點解總係無女朋友？或者係用交友APP約網友見面，但見完一次就永遠無下文？有無諗過其實同你講過嘅嘢有關呢？雖然對方礙於禮貌唔會話你知，但其實你已經暗暗被OUT！

以下就係9個男人最常踩中嘅地雷，令女人一秒黑面，覺得你非常煩厭！

1) 女人認真嘅時候你就講笑

無錯，女人係鍾意幽默嘅男人，但咁唔代表你喺佢認真地講緊工作難題嘅時候，你講唔正經嘅笑話會贏得佢嘅心。即使對方唔講到明，但其實佢絕對唔會想自己難過嘅時候唔單止得唔到你嘅安慰，仲要俾你取笑返轉頭。

2) 糾正唔重要嘅錯處

有時對方講錯少少嘢，好似佢最鍾意嘅導演一共有幾多套電影，又或者係佢鍾意嘅band邊年出道，但你就好似揾錯處咁揪晒出嚟。問吓自己，呢啲問題係咪一定要糾正嘅先？係咪唔講會死人塌樓？如果唔係嘅話就由佢啦，女人都一樣要面，唔鍾意係咁俾人找錯處。

3) 你嘅讚美俾人覺得唔認真或講笑

我哋都明白讚美唔係一件容易嘅事，男人或者怕咁樣會令自己變得好弱。但其實有時候你要放低自己，因為真誠而又啱timing嘅讚美係會徘徊喺對方腦海一段好長嘅時間，你都希望自己係一直留喺佢心入面嘅人啩？

4) 喺唔應該嘅時候畀建議

有時候女人大呻佢哋面對緊嘅問題，但想得到嘅唔係建議，好多時候佢哋其實都知道應該點樣解決，但就只係想呻吓，所以當佢唔係問你建議嘅時候，你只要好好聆聽就可以㗎喇！

5) 永遠唔問對方嘅情況

當你同女仔用whatsapp傾計嘅時候，記住要問吓佢哋嘅情況，因為你唔問嘅話，就準備做話題終結者。女人都係想要一個會關心佢、留意佢需要嘅男人，如果你連問都唔問，對方又點期望你會明白佢，將來繼續發展落去呢？

6) 成日都講你覺得邊啲女人好同唔好

「我唔覺得呢個女人有幾好囉……（下省1萬字）」，其實成日講呢句說話嘅男人都幾難頂，因為你身邊嘅女人唔一定想知道你嘅意見，佢染髮染邊隻色抑或著咩鞋唔係為咗迎合你。其實講呢個話題真係有啲似玩火，仲俾人感覺你好自我中心，所以可免則免啦。

7) 捉緊每次同人辯論嘅機會

如果你對人哋講嘅說話總係抱住質疑同包拗頸嘅態度，咁樣其實真係會令對方好攰，尤其係一諗起如果同你發展落去嘅話，放咗工都仲要保持戰鬥格同你為啲無聊問題拗一餐，真係會令人意興闌珊、急急退場。

8) 期望女人會娛樂你哋

記住唔好就咁同女人講一句「我好悶，有咩做啊？」，其實咁會令人相當討厭，更差嘅係或者有人會覺得咁係帶有性意味。你講咗嘅話，可能對方已經覺得你係一個連講咩都諗唔到嘅大悶蛋。你亦唔應該期望女人喺約會時單方面氹你開心，記住溝通係相向㗎！

9) 當女人話鍾意一樣嘢，你就不斷發問

其實現今好多女仔都鍾意男人玩嘅嘢，好似打機、睇波、睇漫畫等，但就算知道佢鍾意都好，都唔好過份自信當人哋想喺你面前表現啲乜，跟住不斷發問，又或者講到興起自顧自發表偉論。記住好好把握相處嘅時間，等大家相互了解，亦令對方覺得你重視佢嘅感受。

假如男士們可以搣甩晒以上令女人討厭嘅9個習慣，咁你離成功識到女朋友嘅目標就近咗好多喇！

（圖片來源：tumblr）