最近有研究發現，56%嘅受訪打工仔都曾經試過捲入辦公室曖昧或戀情之中。但同同事拍拖其實唔係表面咁簡單，例如一但你哋分咗手，身處同一間公司，每日行出行入都總會碰面，情況相當尷尬。
仲心大心細考慮緊好唔好同同事開始嘅話，就等筆者同大家一齊分析辦公室戀情要注意嘅事啦！
1. 確保開始呢段感情係值得嘅
愛情配對專家提醒，對方喺職場上嘅表現同佢日常生活嘅性格大多數都會有出入，你要問吓自己對工作以外嘅佢有無足夠嘅了解，你想追求嘅係咪就係對方嘅真實面貌，確保就算將來有咩問題發生，你都仍然覺得開展呢段戀情係值得嘅。
2. 唔好被人感覺隨便
辦公室好容易就會流言四起，人多口雜，唔好比佢哋捉到話柄，或俾人覺得自己係隨便嘅人，亦唔好當職場係獵食場所。真係遇到心儀對象，好想同佢好好發展嘅話先好開始啊。
3. 睇返公司政策
如果同同事拍拖係直接違反公司規矩，而而家呢份又係你嘅理想工作嘅話，你就要更加審慎地思索自己對人有興趣嘅原因，會唔會只係覺得方便或者追求一種刺激感，同埋要接受發展關係有機會帶嚟嘅後果。
4. 唔好喺公司有咩親密行為
就算公司規例無禁止同事拍拖，都記住唔好表現得好親密，免得比人捉到話柄，話你哋公私不分。就算周圍無人都好，你哋做嘅嘢都可能會俾CCTV拍低！
5. 要好好傾吓點樣處理最壞嘅情況
平常分手已經好慘，更加慘嘅係前任係你嘅同事，分咗手都要朝夕相對。所以當事情未發展到咁，你已經要同對方好好傾吓萬一真係分手嘅話，你哋會點樣處理。就算真係唔好彩分咗手，雙方都唔應該喺辦公室帶起呢個話題，記住公私分明。
6. 唔好同你上司拍拖
唔好同你上司拍拖、唔好同你上司拍拖、唔好同你上司拍拖，重要嘅事要講三次！因為上司有機會處理到你嘅人工金額同升遷狀況，唔想比人口實，又或者怕感情生變之後會俾人處處針對，就真係唔好咁做啊！
7. 公開雙方嘅關係
假如你哋已經穩定發展中，唔使怕俾同事或上級知道，相信佢哋會理解同祝福你哋。其實職場上雙雙對對嘅同事拍拖、結婚，甚至有埋小朋友嘅例子都有好多架。
8. 唔好畀對方任何特別待遇
問題唔單止係呢樣係錯誤嘅行為，而係當你嘅辦公室戀情一但公開，你又濫用自己嘅職權去幫伴侶做事，咁會直接影響你嘅名聲，甚至係揾下一份工嘅機會。記住喺工作上千萬唔好徇私啊！
（圖片來源：tumblr）
