當兩個人喺一齊，唔單係相愛就可以維繫得到，愛侶之間相處的感覺往往非常矛盾：既美好又累人、陌生又親密，帶著滿滿的愛卻因此刺傷對方，當中的複雜實在唔係旁人能夠明白。

愛與被愛，對大部份嘅人嚟講，可以話係世界上最好的感覺，係每一個人都極力爭取同感受嘅的情感。

能夠揾到一個可以同自己分享回憶的人當然係一件美好的事，但當中有啲嘢係其他人唔會話比你知，但你一定要留意嘅事。事實係，每個人都有唔同嘅相處模式，一段關係中無絕對嘅對錯，但就有啲相處訣竅係你身處其中先會領略得到！

1. 你需要做你唔喜歡做嘅事

生活中往往有很多事會令二人嘅關係僵持，例如當你連同自己嘅家庭、朋友相聚嘅時間都無嘅時候，但就要你出席對方嘅家庭聚會，同一眾長輩交涉；或者係伴侶嘅興趣同自己完全相反，但你都必須學習包容，嘗試接受同融入對方的世界。

2. 培養親密嘅關係需要時間

每個愛侶嘅相處模式同磨合期嘅長短都各有不同，兩個人嘅關係唔會一步登天，即刻到達自在舒服又好親密嘅階段，所以即使係相處咗一段時間你哋仍然會嗌交，咁係好正常嘅。最重要係信任對方會努力經營呢段關係，咁就可以繼續走落去。

3. 維繫二人嘅關係並不容易

維繫一段關係需要耐性、努力、妥協與尊重，係兩個人由陌生人聯結成為一體嘅過程，咁唔單止需要外表互相吸引或者係有共同興趣咁簡單，兩個人都必須經歷一個個困難同考驗，先會成就一段美滿嘅感情。

4. 兩人之間嘅「親密感」相當重要

性唔係一段關係中最重要嘅事，但卻相當重要。性唔單係肉體上嘅滿足，亦係情感上兩個人互相緊靠、相連嘅一種感受。當兩個人嘅關係經歷咗一段時間，去到另一個階段，往往好容易忽略性愛嘅重要，咁樣正正就可能係造就伴侶「偷食」嘅原因。

5. 溝通係維繫關係嘅鑰匙

溝通係好多人都好難掌握嘅事，我哋或者都慣左「發言」，而唔係同對方真正咁「溝通」。愛侶間好多時爭吵嘅成因都係溝通上出現問題而誤解對方。我哋或者慣左收埋一啲秘密唔想比另一半知道，但咁嘅做法係最差嘅，因為最後所有嘢一但爆發，只會一發不可收拾。

6. 坦誠係必要嘅品質

無嘢比謊言更容易摧毀一段關係，好多人都自以為可以只講事件嘅表面，避過核心嘅真相，但咁樣做長遠只會損害兩人之間嘅感情。誠實唔代表你要將生活嘅每一樣細節都報告比另一半知，但遇著某啲特別嘅約會，你的確需要事先同你嘅伴侶交代。

7. 你嘅伴侶未必同你預想嘅一樣

你心目中嘅理想對象同你最後愛上嘅伴侶之間有落差係好正常嘅，但假如呢個係真正適合你嘅Mr.或者Ms.Right，即使同你想像嘅唔同，但佢反而會帶比你更多驚喜同快樂。所以我地要保持開放嘅心，接受安排比自己嘅緣份。

8. 你唔會感到更加「完整」
好多人都假設開展戀情會令佢地揾番失去咗嘅快樂，但無耐之後卻發現自己變得更痛苦。一段最好嘅關係需要兩個人都清楚知道自己嘅特質、對自己有信心，同願意接受對方。我哋唔需要另一半嚟令我哋變得「完整」，因為我哋本身已經係完整嘅個體。

9. 你同另一半會有愚蠢嘅爭吵

無論你同你嘅伴侶有幾成熟，或者你哋有幾愛對方，爭吵都係不能避免嘅。愚蠢嘅拗撬可以由生活上嘅任何一個細節引起，呢啲爭吵本身只係小事，唔會真正影響兩個人嘅關係。但有啲情侶就反而小事化大，甚至喺對方嘅傷口上撒鹽或翻舊帳。永遠都要記住，就算兩人嗌緊交，溝通上都要保持尊重嘅態度。

10. 你需要獨處嘅時間

享受獨處嘅時間對你自己同另一半都係一件有益嘅事，令兩個人唔會迷失自我，喺關係中享受舒服自在嘅感覺。偶爾嘅分別更可以令彼此更掛住、更覺得需要對方，令關係更進一步！

11. 唔係每段關係都可以走到最後

好多人都唔敢諗或者唔鍾意提及戀情破裂呢個可能性，但事實係即使係結咗婚，兩個人最後都有可能離婚收場。唔少人因為相信可以同對方一直走落去，但最後事與願違而深深受傷害，雖然好無奈，但呢個就係殘酷嘅事實。

12. 你仍然會諗起你嘅前度

諗起前度唔代表你想同佢哋喺番埋一齊，咁只係代表你無可能抹走過去。諗起過去發生嘅一切係一件好正常嘅事，咁唔等如你唔愛而家嘅伴侶，咁只係話比你知，無論好壞，前度的確影響咗你嘅人生。唔需要拒絕過去，反而當佢係令你喺下一段關係進步嘅推動力。

13. 你偶爾就會惱恨對方

兩個人為唔同嘅事爭吵，以致果刻覺得對方好討厭，唔想再繼續呢段關係係好正常嘅，最重要嘅係，即使喺咁嘅情況之下，雙方都要明白同相信彼此之間嘅愛可以戰勝矛盾同爭拗。

14. 出軌係好容易嘅事

即使有幾唔想承認，大家都要接受出軌喺現今社會係一件好容易嘅事，極容易接觸同種類繁多嘅社交媒體與交友APPS，都令呢個世界充滿住出軌嘅誘惑。當另一半真係出咗去偷食，咁即係證明佢無好好珍惜你，唔好比佢再有傷害你嘅機會，盡快分開啦。

15. 唔需要在意朋友或家人嘅眼光

無錯，假如你家庭或朋友都好鍾意你嘅伴侶會係一件好好嘅事，但事實係你唔需要佢哋嘅批准而選擇去愛邊一個人，呢個亦唔應該係窒礙你繼續一段關係嘅原因。好多時家長都自以為最了解仔女最需要啲乜，但愛情唔係旁人三言兩語就可以解釋到的。

16. 單靠愛係唔足夠嘅

只係憑住愛去經營一段關係係唔足夠嘅，好似上文提過嘅尊重、坦誠、個人嘅空間等都係令關係長久嘅要素。當然仲有另一樣嘢係好重要嘅，就係大家成日都鍾意掛喺口邊嘅「timing」喇。喺適當嘅時機下相愛係一件最難得嘅事，我哋唔可以確保一段關係可以走到幾時、走得幾遠，唯一可以做嘅就係好好珍惜同愛侶相處嘅每一分每一秒。

圖片來源：tumblr、lifehack