三個 Router 選購術：從此追劇無難度！

手機平板年年出新，規格當然夠強先吸引到消費者換新，正當不少人甚至將手機平板當作工作工具時，往往就有人會問「點解用 Wi-Fi 咁慢」，不講由自可，一睇就出事了，竟然會見到幾年前嘅 HK$100 入門 Router。

通常一般人 Router 既入手方法不外乎屋企用分線或者用 Wi-Fi 或者直頭係寬頻公司送俾你。好多時規格都未必係最新，加上時代久遠又唔壞當然就唔會理佢啦。若果你終於頂唔順而又想換部新野，今日就同各位分享下買 Router 既重點啦。

2.4GHz & 5GHz

近年新推出既手機平板其實都有呢兩種無線頻率，唔明的話可以當做手提電話既 3G / 4G 咁去理解。5GHz 既無線雖然快但亦有弱點，就係穿牆能力較差，反之 2.4GHz 就慢但穩定性會較高。

你屋企用開個款 HK$200~$300 舊 Router 斷估都無呢個功能，但如果你揀番個貴少少嘅新 Router 應該都同時有 2.4GHz 及 5GHz，唔會再好似以前咁慢。

ACXXX 係乜東東

買 Router 通常都會見到包裝上有 ACXXX 呢 D 字樣，對於唔識電腦野既人黎講除左「1900」之外亦都係幾難理解。其實呢個數字「1900」代表佢嘅速度最高可以達到 1900Mbps，一般就係「600 + 1300Mbps」或「1300 + 1600Mbps」兩種。

以 NETGEAR 呢款 R7000 為例，佢嘅理論值就係「600 + 1300Mbps」，前者細數代表剛才講到既 2.4GHz 既最高理論值，大數「1300」就係 5GHz 既速度。一般黎講手機平板都係行到 1000Mbps 以內既 5GHz 無線，所以見到尾數有 1000Mbps 都叫安全，但如果想更好就要揀數字更大嘅。

繼續以 NETGEAR 為例，呢款 R7000 代表嘅 AC1900 向下還有一款 R6400 達到 AC1750；向上看則有 X4S 嘅 AC2600、X6 嘅 AC3200 及X8 嘅 AC5200，邊個好？當然數值愈大愈好，但相對你要付出嘅金錢也都會更多。

記得睇天線

無線 Router 要射得遠收得好，一般來講天線愈多愈好，但也都唔係完全正確。正如頭先所講無線分開 2.4GHz 同 5GHz，每個無線頻率都需要天線，但好似 TOTOLINK 某款 Router 本身有 4 條天線，但實際兩個頻率各用兩枝，所以未必比 1+2 既 Router 好。另外有部份機係會預先裝左粗天線，咁樣都可以加強接收能力。

不過，今年開始有啲高階 Router 除左預裝粗天線，更加隱藏係機身內。好似上圖呢部行最新 三頻 Mesh Wi-Fi 嘅 Orbi 內置 6 條天線，但全部隱藏機身內，外觀完全無天線，所以計天線數量決定速度也都開始唔 work。因為最快嘅高速 Router 已經無外露天線。

睇完呢三點，知道 Router 有咩分別，仲唔快啲買番個新 Router，解決睇劇成日窒下窒下嘅問題！

更多資訊：
▼ CSL送禮：玩遊戲，贏走CSL獨家蜜粉色 Sony Xperia XZ！