【食譜】2017第一發！健康清新豆乳鍋

新年快樂！假期一貶眼就過去。

我昨日已經為接咗既工作開工，做了一個下午。

大少爺真係好好，佢獨自帶包包去玩等我可以專心工作。

大少爺絕對係 Happy daddy負責包包娛樂，昨日早上佢同我講：包包講話想搭巴士講足幾日，我帶佢搭巴士吧。

包包唔肯坐私家車、的士、小巴，係都話要搭巴士，攪到大少爺忍唔住還佢心願。

除了工作就係預備晚餐，昨日決定晚上食清啲就煮豆乳鍋。

個豆乳即係豆漿，我做得當然唔會就咁買盒豆漿就算，我係自己去整豆漿再整個鍋，加上非基因改造嘅粟米。

近年我只會買非基因改造粟米，食過就會知分別，真正粟米係爽甜帶有粟米香呢！

再加上娃娃菜、魚卷、大蔥、紅蘿蔔，再加火鍋肉片菇菇卷，火鍋肉片夠瘦無肥油！

新一年第一篇blog做顏色豐富既菜色，而且之前一篇冬甩太有罪惡感攪到個blog好油膩，就用呢個去平衡一下來個 refresh～

材料大致上係咁，大家可以用雞肉或海鮮都可以。

先講煮豆漿，以前我有部豆漿機後來就掉了。

呢部係 Bosch送我廚師機，不過呢篇blog同部機或品牌無關，純粹係話比大家知。

先將黃豆浸大約8個鐘或以上，再加水去打成豆漿。

我用 160g黃豆浸8小時以上加 800ml水去做濃豆漿。

如果大家做豆漿飲，其實可以用160g黃豆加1000ml-1200ml水去打。

黃豆同水打勻後就倒入煲湯袋內隔渣。

隔出來有大量泡泡，就要隔去泡泡。

開始煲時用中火邊煮邊攪，當滾起時就用慢火煲20分鐘。

點解要煲多20分鐘呢？因為如果豆漿唔煲透就會有草腥味同埋會有機會令到腸胃不適。

所以要煲就要煲透佢，一定要得閒攪一攪同埋小心煲燶有燶味。

咁煲好後熄火可以加冰糖做甜豆漿，或者好似我咁做火鍋也可以。

首先收蔬菜放入去煲同煮熟，然後加鹽。

我呢個LC太大所以煮好後就轉去細個啲嘅煲。

咁最後先加肉就完成，呢個豆乳鍋都可以當火鍋食。