【好可愛啊】陳圓圓捧愛犬做明星狗

藝人陳圓圓（Jacqueline），養有一隻愛犬Tigerbaby，現年約五歲半。Jacqueline透露愛犬早前獲廣告商睇中，拍攝酒店宣傳片，酬勞相當不錯。她表示希望用Tigerbaby日後的工作酬勞成立基金，幫助更多被遺棄的小動物。

Jacqueline分享了愛犬拍攝的趣事：「Tigerbaby喺整個拍攝過程都好配合，連導演都讚佢好有表演天分，話拍佢易過拍小朋友，好得大家歡心。」她笑指愛犬拍攝一整日後，回家即累得倒頭大睡。

陳圓圓愛犬樣子可愛，獲廣告商睇中邀拍廣告做明星狗。

Jacqueline大讚Tigerbaby的IQ及EQ非常高，甚有人性：「我夜晚睇電視，佢唔單止識坐喺我隔籬一齊睇，仲識揀頻道。佢好鍾意睇愛情、家庭、體育、賽馬呢啲節目。佢唔鍾意睇會吠兩聲，鍾意嘅話會好靜咁坐喺度唔出聲，眼定定望實部電視。」