【食譜】聖誕派對好煮意！啤酒雞

無錯！基本上成個12月我都晌慶祝 mode裡面。

雖然嚟緊聖誕好忙，有些朋友聖誕唔可以一齊玩，於是我就搞個小小既生日party叫朋友上來吃飯。

無錯！好多朋友呢個月都會約我出外食生日飯，但我總係有心癮想自己煮一餐。

屋企搞聚會係開心既，又有人陪包包玩～

對於我來講煮嘢係唔辛苦的，煮30人既聚會都試過，10個人唔夠既真係同便飯無乜分別。

而且我又可以研究下新菜式，今次焗啤酒雞，估唔到呢個焗雞咁好食。

隻雞坐住罐啤酒，焗既時候啤酒會產生蒸氣咁隻雞裡面係蒸焗緊，亦都同「扣」既方式近似。

而雞皮位置會脆身、加上打直去焗油份會流到焗盤中，雞皮內脂肪都會流出，雞肉焗完後變得鬆化同帶有啤酒既麥香。

呢隻雞比我想像中受歡迎，朋友話下次一定要再食，下次要焗夠2隻先夠，最重要係佢好容易整呢！

今次我又整了，裡面係黑松露醬同mozzarella cheese，用煎既方法令佢香脆。

近幾次聚會都有呢個芝士春卷，太受歡迎，個個食過都話下次要食，咁我唯有每次都整唔同餡料。

今次係煙三文魚配菠菜，結論係：我覺得最好食係磨菇配芝士加煙三文魚。

忙亂中影既白汁蝦肉一鍋意粉，佢好食但今次無時間影得靚。

點都要有沙律的。

我今年第四個生日蛋糕呢！多謝。

好！係時候要寫隻焗雞食譜：

材料：

雞    1隻

啤酒    1罐

蒜頭    3-4粒磨蓉

鹽    1湯匙(只需要搽勻隻雞便可以)

黑胡椒    少許

檸檬汁   半個

蔬菜    隨意

做法：

1. 雞洗淨抹乾水(我用法國無激素雞)

2. 早一晚醃定隻雞， 用鹽、胡椒、蒜泥、檸檬汁撈勻，前前後後左左右右裡裡外外都搽勻

3. 然後包好雪一晚

4. 焗之前拎出來回溫30分鐘，焗之前10分鐘用半罐啤酒淋一淋雞身，啤酒會令雞肉鬆化

5. 用罐頭刀打開個啤酒罐頂(唔好倒瀉d啤酒)，然後打直放隻雞上去(令雞坐上啤酒)

（*由話隻雞較大隻，我要將啤酒罐剪成一半高度）

6. 放上焗盤加上菜蔬，我用紅蘿蔔、洋蔥、薯仔等等

7. 由於隻雞打直，個頂部容量焦黑，我會晌頂加塊錫紙，雞亦尖位都要

8. 用200度火焗40-50分鐘，或呈金黃色便可以 

9. 稍為放涼後將雞剪件，罐啤酒可以淋上菜蔬上及點雞用，唔好浪費

因為佢除了啤酒外仲會有焗出來既雞汁，啲菜蔬吸收日月精華後又係特別好食的！