【裝修佬話你知】唔怕甩色縮水！你識唔識洗牛仔褲？

牛仔褲係永遠唔會過時嘅服裝，牛仔褲花款多、容易配搭、使用壽命長，一直都頗受裝修佬青睞。牛仔褲比較特別，清洗嘅話會有機會甩色、變形，所以好多裝修佬朋友都會選擇唔洗來保持佢獨特嘅顏色同形狀。但日常穿著難免會沾上塵土污漬，真係令人又愛又恨！

其實，清洗牛仔褲有唔同嘅方法，究竟係點？裝修佬話你知。

（網上圖片）

（文：Freaky）

新買嘅牛仔褲，用1羹鹽放入清水，將牛仔褲先浸10個鐘，今後再洗就唔會甩色甩好嚴重，或用1：20嘅白醋及水浸牛仔褲半個鐘，同樣有鎖色作用。 　　

無論牛仔褲有幾污糟，都唔好用熱水清洗，洗牛仔褲嘅水溫最好係20度以下，用太熱嘅水會容易變形，另外，千祈唔好用熨斗熨牛仔褲，熱力會令褲縮水。 　　

深色同淡色牛仔褲一定要分開洗，幾條唔一樣色嘅褲會染色，所以最好每條都單獨洗。 牛仔褲唔適宜經常清洗，深色牛仔褲約穿3、5次或一個禮拜洗一次便可，白色、卡其、駝色等淺色就要視污糟程度決定。 　　

唔好太大力搓洗牛仔褲，洗嘅時候先浸10分鐘，然後輕輕按壓，切忌用洗衣機同刷洗，用清水重複清洗3-4次就已經足夠，用手搓洗牛仔褲，可以有效保持牛仔褲嘅原色。 　　

洗牛仔褲時要將入面翻過來洗，晾嘅時候一定要回轉面，儘量將褲整成圓桶狀，咁樣會乾得比較快。 　　

牛仔褲清洗後不宜擰乾，最好係趁佢仲滴緊水嘅時候掛喺通風處曬乾，用衣夾夾住褲腳，倒轉掛，咁樣褲腳曬乾後會自然點。留意，唔可以喺強光底下曬，陽光直接暴曬會造成氧化退色。 　　

如果牛仔褲唔係有油污或其他污漬，盡可能減少洗衣粉用量，甚至清水清洗便可。 　　

如果夏天出汗多，可以將牛仔褲掛喺通風地方，噴小小清水，等佢順風曬乾，咁樣牛仔褲嘅汗味就自然消失。 　　

如果牛仔褲黐住污糟野，可以喺污糟地方噴清水，然後輕輕撮走，再掛喺通風良好嘅地方，自然風乾便可。

(以上圖片均來自網路，如有任何版權問題，請與本站聯絡)