【湯水】動物人參 秋冬潤肺首選！鵪鶉雪耳百合蓮子湯

秋冬時份，當然要煲多啲滋潤嘅湯水，養陰潤肺更為重要，因為肺部就對應五色食物中的白色，所以秋冬就要多食白色食物，飲多啲白色食材嘅湯就當然可以滋潤肺部，同時又可以預防及舒緩乾燥，所以就嚟應應節氣，煲番個鵪鶉雪耳百合蓮子湯。

今次我都係第一次煲鵪鶉，成日都聽媽媽級講鵪鶉係好啱小朋友同老人家飲用，因為鵪鶉有「動物人參」之稱，鵪鶉肉是典型的高蛋白、低脂肪、低膽固醇食物，可以補益五臟及補中益氣，而且仲不寒不燥。

想煲好耐，不過依家都真係好少地方有鵪鶉買，不過係我唔打唔撞下係某大有機食品公司見到，仲做緊大特價，一包兩隻都只係$58，所以就即刻買嚟試下啦！

材料：

鵪鶉2隻、雪耳1朵、無花果4粒、百合及蓮子各1兩及瘦肉約$20

做法：

1. 處理蓮子時就要小心，因為有部分蓮子入面嘅蓮芯會未清除，如果加埋依啲蓮芯一齊煲湯，就會令到湯帶有少少苦味，所以一定要清走晒呀！

2. 鵪鶉及瘦肉洗淨汆水備用；雪耳浸洗去蒂切細舊；其他藥材浸10分鐘沖淨

3. 煲內放約3L水，水滾後放入所有材料

4. 待再次滾起時，用大火加蓋煲約30分鐘

5. 再轉慢火加蓋煲2小時，煲鵪鶉湯係比瘦肉多啲時間，因為煲耐啲先可以餚濃味啲呀

6. 最後加入少少鹽調味，就可以飲啦

第一次飲鵪鶉湯，又真係估唔到係咁清甜，而且仲一啲都唔油膩，我家兩位老細都大讚依個新嘗試唔錯，叫我下次可以再ENCORE添！

溫馨提示：

- 由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！

- 雖然雪耳係好味又有益，不過都要再提多大家煲過嘅雪耳一定要即日食/飲晒，如果隔夜，經過一夜嘅浸透，佢就會放出一啲有害物，到時就有益變有害啦！