大家有冇試過去旅行嘅時候,無端端夜晚扎醒,發覺自己周身痕,望清楚仲見到全身都係紅印?如果有嘅話,或者你就好似最近大陸嘅一位女士一樣,闖進左床蝨溫床,自己送上門比佢地開大餐喇!

喺今個月15號,本身來自福建嘅嚴女士就獲派到深圳公幹,但諗唔到喺入住左當地一間酒店之後,令人諗起就起雞皮嘅事件就隨之發生。因為做完野一日,嚴女士都累到咩都無諗,所以就算見到床上面有啲黑色粒粒,佢都照瞓諗住聽朝先算。

點知雖然瞓左一晚無事,第二晚再瞓嘅時候佢就感覺到自己身上面好似有野爬嚟爬去咁,又痕又痛。一開燈之後嚴女士終於都睇清睇楚,原來自己手腳、身體都比一粒粒黑色嘅床蝨咬,而且最少更有幾十隻!

▼嚴女士被床蝨咬嘅苦況。


(圖片來源:深圳晚報)

好在嘅係喺反映房間狀況之後,酒店方面都願意承擔醫藥費,如果唔係嚴女士就真係得不償失喇!

 

咁究竟自己外出旅行,係唔係真係無可能睇得出間房有床蝨嘅呢?小編宜家就立即教番你幾招等你傍身!

1. 第一時間睇床頭
床蝨睇佢個名就知道,床就係佢地嘅溫床,所以佢地嘅活躍範圍就多數會係床鋪嘅20尺範圍之內。所以去到留宿嘅地方,最好第一時間check下床頭,用電筒照明睇清楚幽暗位置,有床蝨的話都一定會無所遁形。

2. check下床墊表面及底面
打開床鋪,check清楚床墊表面及底面,呢兩個都係床蝨經常躲藏嘅地方。

3. check下床墊有無血跡同蟲糞
如果有床蝨出沒,床墊或者就會有血跡同蟲糞,所以記得睇清楚有冇呢啲痕跡。

4. check下床頭櫃同衣櫃
之前都提過,幽暗位置都係床蝨匿藏之處,因此你都必定唔可以睇漏床頭櫃同衣櫃。

如果check完之後第二朝都係比蝨咬,咁你就一定要記得喺番入屋企之前檢查清楚,等自己唔會帶埋啲蝨番屋企先好呀!

封面圖片:pestcontrolperth, chrislema