【食譜】咩嚟架？創新mix and match：檸檬茶雞翼！

我一向都係檸檬茶怪，基本上都要每日飲一包先安樂，可能依啲就係心癮(千其唔好學我呀！)。

檸檬雞翼我就成日都煮，今日竟然見到有朋友仔介紹用檸檬茶嚟食譜，我見到就即刻心心眼，所以就又跟風試下整先～

雞翼真係好易煮，同埋配搭又多元化，所以每當我諗唔到煮咩時，雞翼就最啱我依啲偽大廚。

今次煮嘅檸檬茶雞翼都唔難，材料只係：

需要雞翼一磅、檸檬茶一包、檸檬一粒

做法 :

1. 雞翼解凍後用鹽水浸15-20分鐘，然後隔水備用

2. 用檸檬半個揸汁，再加入魚露1.5湯匙、糖半湯匙、薑蓉1.5湯匙，加雞醃料最少醃5小時

3. 用薑片及蒜頭爆香鑊

4. 然後以中火油鑊煎雞翼兩面至金黃色

5. 加入檸檬茶及餘下的檸檬片(大約蓋過雞翼面就可以)

6. 最後以中小火加蓋煮8分鐘(要間中打開望一望，因為怕會乾水，咁就會好易燶啦)，大約至收剩1/4汁料，就可以快手兜炒

開餐啦～！

可能係因為係檸檬茶關係，我覺得真係幾好食，個汁同雞翼都帶點點酸酸甜甜，食落都夠晒開胃呀！