【生活小貼士】擺脫異味！擺放了一年的羽絨衫該如何清洗？(巨龍)

話咁快，11月就到尾聲啦，意味住寒冷嘅冬天就快來臨，擺咗成季嘅羽絨係時候可以派上用場啦。

羽絨算得上係家居必備嘅防寒衫，著起身又暖又舒服輕身，但你會發現，擺咗幾個月嘅羽絨衫已經有陣異味，跟住要做嘅梗係同件羽絨洗白白啦。但羽絨要點洗呢？又有啲咩需要注意呢？裝修佬話你知。

首先要準備一盆溫水，留意水嘅溫度唔可以過熱，並係水度放入適量嘅洗衣液。 

把羽絨衫放係水度浸10分鐘後就可以開始清洗，注意唔好用手去揉搓，污糟嘅地方用軟毛刷或牙刷清洗便可，其他地方都順便刷埋。 

刷乾淨後係擰嘅時候唔好擰麻花來擠壓水份，要順著往下擠壓，完咗用清水過一次水，將洗衣液嘅水份清洗走。 

清洗第二次嘅時候，係水都滴少許白醋約一蓋嘅分量，將羽絨衫放水度浸5~10分鐘，再大概揉幾下便可。注意係晾嘅時候，唔好擰麻花咁去擰水，要順著紋路兩手對著擠壓便可，記得一定唔可以放係太陽下暴曬，要放係通風地方，一般放係廁所2、3日就可以乾。 

裝修佬溫馨提示 

羽絨嘅主要成分係蛋白質，放到乾洗店經過烘乾，羽絨會容易變脆，變碎，下次再著就無以前咁暖，而且黐到底衫都係毛。

另外，羽絨洗完後發現件衫會好扁，唔蓬鬆，呢個時候將衣服擰落來，平放係床度，用面積大嘅衣架輕輕拍打羽絨衫，你就會發現，件衫會恢復原先形狀。

最後提醒大家，羽絨衫一定要手洗，唔好貪方便擺落洗衣機或擰出去乾洗，因爲會破壞羽絨原本結構架。

(以上圖片均來自網路，如有任何版權問題，請與本站聯絡)