【湯水】無花果蘋果菊花茶

早幾日奶奶上嚟探小小豬嘅時候蘋果，佢買左好多粒又大又紅嘅蘋果，有咁多粒都好難一次過食晒，最好就當然係用嚟煲涼茶，所以就煲無花果蘋果菊花茶，等小小豬保護眼睛之餘，又可以滋潤下啦。

哈哈...其實今次我都冇特定煲啲乜，只係小小豬話啲涼茶飲晒冇嘢食(依個衰豬真係似足我，唔鐘意飲清水)，見屋企有菊花，又有無花果，所以就用佢地嚟煲蘋果茶啦！

材料：

今次我就用左蘋果3個、無花果6粒同埋菊花一両(約37.5g)。

做法：

1. 首先將蘋果洗淨去核及切粗粒(記得要係洗蘋果前用刀刮了一圈，刮走面嗰一層果蠟)；無花果切開細細份；菊花先用浸半個鐘後，瀝亁備用。

2. 先加入約3公升水，然後加蘋果粒及無花果。

3. 待水滾後，轉慢火加蓋用細火煲40分鐘。

4. 最後再加入菊花，要煲多約15分鐘。

5. 最後焗多15分鍾，隔渣後就可以飲啦。

有蘋果同無花果嘅甜味，仲有佢最鐘意嘅菊花茶味，小小豬而點會唔鐘意呢，完全唔洗我提，話咁快就飲晒成杯啦！

所以話呢……間唔中係屋企入定啲材料，到有需要時都可以隨手煲到涼茶滿足小小豬，所以老公唔成再成日話我好似個婆仔咁買買埋埋一包二包，到有需要時就係我嘅武器，隨時可以出手呀！

溫馨提示：由於材料都涉及藥材成分，所以都係好因應個人體質，所以大家記得係煲之前，要了解自己嘅體質，如有需要可以問下相熟中醫/藥材店職員，呢個湯茶啱唔啱自己呀！

https://www.facebook.com/kinseymama/