【湯水】失聲救星 - 鹹竹蜂

我病左好幾日，喉嚨痛足咁多日，我都已經睇左醫生食左三日藥，不過把聲仍然未開返，為左要盡快開聲，所以非常時期用非常手段，聽朋友介紹試下啲古方，所以就做左人生嘅其中一件大膽事，就係飲焗咸竹蜂啦~

其實原本我都只係打算買咸竹蜂焗水飲，不過藥材店員就介紹我加多幾種藥材齊齊焗，可以快啲開聲。一聽到可以快開聲我都即刻唔考慮咁多，請店員執左兩份俾我！

材料就有鹹竹蜂、木蝴蝶、胖大海及甘草，份量方面就可以請藥材店員幫手，因為佢地都應該非幫熟手。我買左兩份平均都係$10一份，價錢都算合理呀~

黑卒卒嘅主角鹹竹蜂，其實望落都有點驚，唯有同自己講....都只係蜜蜂，最重要都係飲完可以開聲，所以咩都豁出去啦~

我今次用象仔杯嚟焗，所有首先要將隻杯用啲普通熱水暖左隻杯先(大約15分鐘)，然後就加入所有材料~

加入熱水之後，記得要篤爛隻鹹竹蜂，就可以更加出味。過程係有點恐佈，不過為目的都要咁做呀~

大約焗半小時~

慢慢倒出嚟就飲得啦~

飲完一杯之後，可以再加熱水繼續泡飲，可以直至味精變淡為止~

坦白講，其實入口第一下都真係有啲難為情，可能我仍然係諗住佢嗰個客出嘅蜜蜂樣。第一啖飲落真係覺得好鹹，為咗開聲唯有頂硬上。但飲完第一杯之後喉嚨真係舒服咗好多，之後習慣咗佢個味道，又唔係太反感，所以我都不停加水繼續飲左好幾杯呀~

飲完真係有啲驚喜起碼我把聲都開咗少少，喉嚨唔再痛，所以依一個古方對我嚟講又真係有效哦！

PS：我當日早晚飲左各一次，第二日起身把聲又真係開返，雖然唔係話開曬全部，不過都仲叫做可以講到嘢，可以同人傾計同做到我嘅任務，所以話古方都其實係信得過呀！

溫馨提示：
– 由於材料都涉及藥材成分，所以每個人嘅體質都唔同，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！