【甜品食譜】藍蝶：蝶豆花椰汁糕

本身好唔喜歡藍色，除了牛仔褲外我得一件落街既衫係深藍色

包包係男仔都無可能完全唔接觸藍色

近日卻對蝶豆花產生興趣，但唔知香港邊度有。

點知我姊妹一家去完泰國有買蝶豆花，仲問我有無興趣，我幾乎跑入廚房煲飯咁lur飯應，因為接觸唔同食材係我興趣呢！

呢個係蝶豆花椰汁糕，蝶豆花其實無乜味，所以今次個糕係椰汁味為主。



我係絕對盡量禁止包包食色素食物，出街有時無辦法但喺家中就盡量少比有色素既食物佢食，包括茄汁。

所以呢個糕佢有興趣都會比小小佢食(佢肯定咬一啖就唔要，佢對甜食不大興趣，只喜歡食生果)。

呢個糕既食譜質感係我最喜歡，有彈性又唔會實。

大家無蝶豆花唔緊要，可以將夾層用斑蘭葉榨汁去代替或用咖啡、甚至你喜歡魚香茄子又做得到既話都可以，哈～

蝶豆花好得意，你將佢泡喺水就會變藍色、加檸檬汁就會紫色！

材料：

椰汁層

椰漿  400ml

奶    100ml

糖    100g咁上下，其實多與少大家可以試味，我自己試到合適為標準，唔會度到好準

魚膠片  25g (如用魚膠粉用同一份量)

做法：

1. 魚膠片冰水浸軟

2. 椰漿加奶加糖，座水整熱，直至糖溶便可以，加入魚膠片待溶化

3. 放涼備用


蝶豆花層

材料：

蝶豆花       12-15粒

熱水水       400ml

糖     80g咁上下

其實多與少大家可以試味，我自己試到合適為標準，唔會度到好準

魚膠片  20g (如用魚膠粉用同一份量)

做法：

1. 魚膠片冰水浸軟。

3. 蝶豆花及糖放入熱水中，直至變成深藍色後可以拎起啲花粒。

3. 將魚膠片放入蝶豆花水中，攪至融化便完成。

4. 將椰汁層放底，雪至凝固(可以放入冰箱急凍，但要留意唔可以結冰)再加蝶豆花層，梅花間竹去做便完成。

TIPS：

*答了100次的題目，答案：魚膠片同魚膠粉同等份量。

*白色層做底及面，所以份量會多過顏色層。