【湯水】滋陰潤燥：蘋果雪梨三棗茶

我之前都有間中煲三棗茶俾小小豬飲，不過因為個顏色關係，小小豬次次都唔會十分願意飲。

早幾日見有朋友仔教話可以加埋蘋果及雪梨一齊煲，個顏色靚啲之餘(即係冇咁黑卒卒)，味道可以更加清甜，所以我又嚟試下依個蘋果雪梨三棗茶啦~

三棗茶有咩好？原來將紅棗、南棗同埋蜜棗一齊煲，除左對補氣血更有效用之外，因為棗類都有抗過敏作用，所以對氣管敏感而引致容易咳嗽都會有調理作用。補益得來又唔會太燥火，所以對好啱小朋友飲用。

今次加埋蘋果同雪梨，除左味道更加甜之外，仲非常滋潤，可以有滋陰潤燥之作用，所以就更加啱小朋友依家嘅轉季時飲用呀！

材料超簡單，只需要：

蘋果3個、雪梨4個、雪梨乾3-4片、蜜棗5粒、雞心紅棗10粒及藍棗5粒

做法：

1. 雪梨乾、蜜棗、紅棗及藍棗浸洗一陣，紅棗去核洗淨

2. 新鮮雪梨就算去清晒啲芯都一定係有少少酸，依個就係新鮮雪梨特性，所以就要加幾片雪梨乾就可以中和返那一陣微酸味(我試過幾次又真係WORK呀)！

3. 蘋果及雪梨去芯切塊洗淨

4. 煲內放3L水，然後加入所有材料

5. 待煲滾後，用大火加蓋煲約15分鐘

6. 再轉小火加蓋煲多45分鐘

7. 喺煲緊嘅時候，可以將三棗壓一壓，咁就可以出味啲

8. 最後再焗15分鐘，隔渣後就可以飲得

絕對唔係講笑，依個蘋果雪梨三棗茶絕對係我煲過咁多涼茶最好飲嘅，真係強力推介俾大家。小小豬不知幾鐘意飲，一杯接一杯咁快快口飲，仲邊飲邊話好好味。另外，當我倒俾老公飲時，竟然話唔似係我自己煲，話仲好飲過坊間買嗰啲…...哈哈哈！

睇見佢地兩父子飲得咁開心，真係勁有滿足感，所以話呢...…我煮嘢嘅力量都係來自佢地呀！

溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！