一個人嘅衣著品味都可以反映出佢地嘅內在性格啦!何況係出自佢地親手嘅字呢?事實上喺外國調查刑事罪案方面,筆跡其實亦都會作為分析一個人精神健康嘅其中一項線索,此外係一般職場上,更有公司會利用筆跡分析應徵者嘅為人添!

咁究竟你嘅筆跡係唔係真係能夠反映出你嘅性格?外國筆跡專家Kathi McKnight就以佢專業嘅角度,從9大方面分析執筆者嘅為人。唔知道大家喺對比過自己手字之後,覺得McKnight講嘅準唔準確呢?

▼ 字體大小 ▼

字體較大嘅人,一般都係想爭取認同以及其他人注意,喜歡同其他人交流而且性格外向。相反字體較小,則顯示出你個人較為有專注力,但就相較內向。

▼ 字體傾斜 ▼

字體向右傾斜,代表你好有親和力,做事愛憑直覺,容易感情用事。另外你亦都非常重視自己朋友以及親人。字體筆直的話,則顯示出你處事會以邏輯為首決條件,唔會以個人情感掌管任何事情,實事求是。最後假如你嘅字體向左傾斜,就表示你喜歡獨來獨往解決事情,而且處事手法較為保守。

▼ 書寫力度 ▼

如果你寫字非常用力,咁就代表你有著強烈情感,有著較快的反應。相反如果你寫字非常輕力,就代表你為人能屈能伸,而且亦不會讓情感令你感到疲累。

▼ l及t字頂部 ▼

喺書寫英文字嘅時候,如果l字經常都會出現圈圈嘅話,你就應該係有較大抱負以及願景。但如果相反係無出現圈圈嘅話,你為人就較為踏實。另外如果喺書寫t嘅時候有圈,咁就代表你對任何事情都非常敏感,做事過分執著。相反如果T字緊密無任何圈出現,你就係一個非常有規律,自制能力極高嘅好員工。

▼ y字底部嘅鉤 ▼

如果你寫個y字嘅時候字體比較纖幼,咁就代表你對認定邊個係你好朋友方面非常揀擇。但如果你個y字非常圓潤,咁就代表你朋友圈甚廣。此外如果你個y字拉得非常之長,你應該非常熱愛旅遊。但如果你較為喜歡留喺屋企的話,你寫出嚟個y字就則會相反非常短小。

▼ 字體連接 ▼

寫英文字嘅時候如果字體緊貼,咁即係代表你處事理性,有原則以及會思前想後才下決定。但如果你字母與字母之間有著一點距離,咁就代表你天資聰敏,為人直率。

▼ i及j嘅點 ▼

部分人喺書寫i或j嘅時候,係會將上面嗰一點畫做圓形,而這種嘅書寫方法則代表左你童心未泯,非常活潑且有藝術細胞。但假如你寫一點嘅時候都只係普通一點過,咁就代表你唔喜歡雜亂無章,而且非常注重細節。

▼ t字交叉部分 ▼

t字交叉部分如果較高,就代表你好高望遠,而且非常有自信。但如果相反較低,就意味你目標較低,此外更對自己無乜信心。

▼ 行距 ▼

行距較小嘅人時間觀念會較為薄弱,相反行距較大嘅則非常重視界限及規則。

圖片來源:Business Insider, Tumblr