【食譜】清新好滋味！檸蜜焗雞翼

每日諗煮咩餸都真係幾頭痛，相信好多煮婦媽媽同我一樣有依個苦惱。

為左有多啲唔同款式吸引兩位老細嘅胃口，依家我都會好努力咁上網睇食譜，搵啲易煮又好食嘅俾啲新鮮感。

早幾日見到有朋友仔分享依個食譜，見簡單得嚟又好似會幾開胃，所以就買材料試下整依個檸蜜焗雞翼俾小小豬食啦！

材料：

雞翼 10隻、檸檬 1個半、蜜糖及迷迭香適量、鹽 1茶匙、糖 半茶匙、老抽 1湯匙

做法：

1. 雞翼溶雪後洗乾淨，然後加入迷迭香、鹽、糖及老抽醃好，由於要自已醃製，所以最好就預早一晚將啲雞翼醃好，咁就可以等啲雞翼入味啲呀

2. 將一個檸檬切成薄片

3. 將雞翼放上高架(盡量去除多餘既香草)，然後將檸檬片放喺雞翼上

4. 先用高架光波240度8分鐘

5. 之後取走檸檬片，搽上蜜糖(想香口啲可以加多少少蜜糖，不過唔好太多，如果唔係好易燶呀)

6. 最後反轉雞翼再光波多5分鐘

熱辣辣出爐就食得！

入口就有好香檸檬味，感覺都幾清新，而且仲係以光波方法，食嘅時候又少左一陣油膩感，所以都幾啱我地口味呀！