【室內設計】家有寵物裝修設計（一） (Freaky)

寵物係我地嘅朋友，甚至係屋企人，佢地或者係小巧得意，或者高大威猛，或者性格內斂，或者熱情奔放……

相信佢係你心目中嘅位置都非常重要，所以我地係裝修方面要全面顧及佢地。

以下裝修佬為大家分享屋企有寵物嘅裝修建議part 1。

屏風做緩衝空間 

狗仔見到陌生人會亂吠，可以係客廳用屏風做間隔。屏風嘅首要條件係要結實。但千祈唔可以用藤制，如果唔係好快你會發現屋企無咗個屏風，剩低啲碎。  

牆面材料 

養寵物嘅朋友，切記唔可以用牆紙，牆紙雖然好睇，但貓貓鐘意狂抓或狗狗屙尿嘅天性係難以更改，為咗避免呢類殘劇發生，選擇易於清潔同修復嘅塗料牆為上策。

電源位置要高 

為避免寵物一不留神撞到電源線而出大麻煩，電源同插座最好還是安裝係佢地掂唔到嘅位置，或係電源前面加蓋或裝飾物。儘量減少裸露係外面嘅電線。 

護欄安全性 

露台或樓梯嘅護欄會係寵物嘅安全隱患。以前新聞上就發生過狗狗被夾係露台護欄郁唔到，差D無命。所以養寵物嘅朋友係設置樓梯同露台護欄時要多加注意，可以係護欄前面加一塊鐵網，12蚊店有得賣。

飾品小物件小心放 

玻璃飾品、茶具及各種小物件儘量放係安全位置，花樽之類嘅唔好放係茶几，你嘅曳豬可能會唔小心整爛。 

寵物專屬門 

唔想局限寵物嘅活動範圍，希望寵物融入生活環境，可於門下設計寵物出入門，方便自由進出居家各空間。善用空間角落或轉折空間，規劃寵物專用休息、活動區域，或作為寵物相關用品收納區。 

狗屋鋪瓷磚同排水口 

為寵物健康著想，要注意選擇濕度適當、通風、保暖、容易清潔嘅地方放置佢地嘅狗屋。寵物活動範圍鋪設瓷磚同排水口嘅設計，方便日後主人清潔。

傢俱搭配可替換 

由於貓磨爪習性同狗鐘意亂咬傢俱，傢俱、櫃體要儘量避免木皮材質，沙發等傢俱更應以可方便隨時更換嘅布沙發套為首選。