剩係得俊俏嘅外表,喺呢個世代簡直係完全唔夠用!想要身邊嘅朋友多啲留意自己,同時令異性對你深深著迷?醒目及知性嘅打扮當然就係最能夠抓緊別人嘅注意力,以及能夠讓你以較為專業嘅觀感贏得大家嘅尊重。

咁究竟要將自己喺短時間內提升為知性嘅偽文青,有啲乜係需要特別注意嘅呢?小編今日就整合左以下呢6點,希望你能夠從穿搭及個性方面開始慢慢改變啦!

1. 戴番副眼鏡

雖然戴眼鏡可能無咁有型,但原來眼鏡對於其他人嚟講其實卻係智慧嘅象徵。就此,維也納大學就曾經進行過一項研究,並且邀請左76位志願者就78張照片評分。最終經過評分之後,研究人員就發現戴有眼鏡嘅相中人喺智慧方面,評分會較無戴嘅高分。同時,研究亦都顯示無戴眼鏡嘅相中人較有戴眼鏡嘅人更為吸引。

2. 識得喺唔同場合配合唔同衣著

除左眼鏡以外,衣著配搭其實都好能夠反映出你嘅為人,例如根據研究對於學生嚟講,穿起較為莊重衣服嘅教學助理相較穿便服嘅,比佢地嘅感覺係較為聰明。但同一時間相對穿著便服嘅教學助理,身穿莊重衣服嘅性格就感覺較為沈悶。此外從另一項研究當中,結果亦都反映身穿實驗室白袍嘅人會喺測試當中有著更高集中力,顯示衣著的而且確能夠影響一個人嘅觀感,以及自身性格。

3. 放低你手上面杯啤酒

人如果唔自制,酒後就好容易會亂性,然後做出好多失儀嘅行為。亦因為「酒後亂性」嘅形象已經係根深柢固,所以根據密歇根州及賓夕法尼亞大學研究,男士如果手拎住一杯啤酒的話,其實睇上去亦都無咁醒目,較容易令人聯想起無咁聰明嘅酒鬼。

4. 講野要有抑揚頓挫

講野時聲線無咩變化,又無任何抑揚頓挫,其實都會帶來非常沈悶嘅感覺,令人唔想再聽你講野落去。而根據研究發現假如兩位朋友講出相同嘅語句,說話比較急速、大聲,而且並唔會斷斷續續嘅個一位其實比人嘅感覺都會較為聰敏,顯示出佢較為有自信。

5. 行路唔好太快,又唔可以太慢

根據波士頓大學嘅一項研究,當人行路時嘅速度比其他人較快或者較慢,其實原來都會影響對其他人嘅觀感。無論係比其他人行得太快定係太慢,原來同樣都會令人覺得你無咁聰明。所以,同其他人步伐一樣先至係最獲他人接受。

6. 做人要謙虛

雖然上述例子都係要求你扮聰明,但實際上係同人交流嘅時候,記得要懂得做人謙虛,因為根據達克效應,越無能力嘅人其實就越會因為自視過高,而相反有才能嘅人則低估自己能力。此外對於其他人嚟講,懂得接受他人意見及承認自己不足亦顯示你較為能幹。